यौन दुर्व्यवहार घटनाका कसुरदार गिरफ्तार

  ०७९ असार १५ गते

१२ वर्षीया बालिकालाई यौन दुर्व्यवहार गरेको कसुरमा प्रहरीले सुरूङ्गा नगरपालिका–४ मधुपट्टीका ३० वर्षीय रमा भनिने रमाकान्त चौधरीलाई असार १४ गते गिरफ्तार गरेको छ ।

गाउँघरमा लुकीछिपी बसेको अवस्थामा गिरफ्तार गरी चौधरीलाई कैद भुक्तानको लागि राजविराज कारागार पठाइएको जिल्ला प्रहरी कार्यालय सप्तरीले जानकारी दिएको छ ।

पीडित बालिकालाई चौधरीले ०७४ साउन ७ गते यौन दुर्व्यवहार गरेको भन्दै पीडितकी आमाले इलाका प्रहरी कार्यालय कडरबोनामा साउन १२ गते उजुरी दिएकी थिइन् ।

पीडितले दिएको उजुरी प्रहरीले साउन १२ गते नै दर्ता गरी आरोपित चौधरीलाई सोही दिन गिरफ्तार गरेको थियो ।

पीडित बालिकाको स्वास्थ्य परीक्षण रामकुमार उमाप्रसाद स्मारक अस्पताल लहानमा ०७४ साउन १२ गते नै गरिएको थियो ।

जिल्ला अदालतको आदेशले आरोपित पुर्पक्षका लागि ४० हजार रुपियाँ धरौटी राखी ०७४ भदौ १ गते तारेखमा रिहा भएका थिए ।

न्यायाधीश श्रीप्रसाद सञ्जेलको इजलासले ०७५ मङसिर २५ गते आरोपितविरुद्धको अभियोग दावी पुग्ने अन्तिम आदेश गर्दै चार वर्ष कैद ठहर गरेको थियो ।

कैद सजायको फैसलापछि चौधरी फरार रहेकोमा खोजतलासका क्रममा चार वर्षपछि गिरफ्तार भएको डिएसपी माधवप्रसाद काफ्लेले बताउनु भयो ।


मनोहरकुमार पोखरेल