यौन दुर्व्यवहार घटनाका आरोपितविरुद्ध उजुरी दर्ता

 

१३ वर्षीया बालिकालाई यौन दुर्व्यवहार गरेको भन्दै तिलागुफा नपा-४ का २८ वर्षीय लक्ष्मण शाही र सोही ठाउँका २५ वर्षीय दिपेन्द्र शाहीविरुद्ध पीडित पक्षले जिल्ला प्रहरी कार्यालयमा मङ्सिर १५ गते उजुरी दिएको छ ।

पीडितका आफन्तले दिएको उजुरी दर्ता गरी अनुसन्धान सुरू गरिएको जिल्ला प्रहरी कार्यालय कालिकोटका प्रमुख डिएसपी सुवासचन्द्र बोहोराले बताए ।

पीडितलाई आरोपितद्वयले मङ्सिर १४ गते मोटरसाइकलमा राखेर जङ्गलमा पुर्‍याई यौन दुर्व्यवहार गरेको पीडित पक्षले आरोप लगाएका छन् ।

पीडित बालिकाको स्वास्थ्य परीक्षण र उपचार मङ्सिर १५ गते जिल्ला अस्पताल कालिकोटमा भएको प्रहरीले जनाएको छ ।

पीडित पक्षले उजुरी दिएपनि आरोपित दुवै फरार रहेकोले खोजी भइरहेको जिल्ला प्रहरी कार्यालयका डिएसपी बोहोराले बताए ।


कालीबहादुर मल्ल