यौन दुर्व्यवहार घटनाका आरोपितविरूद्ध उजुरी दर्ता

 

१२ वर्षीया दुई जना बालिका, १३ वर्षीया तीन जना बालिका र १६ वर्षीया बालिकालाई यौन दुर्व्यवहार गरेको आरोपमा धुलिखेल नगरपालिका-६ घर भई सोही वडामा रहेको सञ्जीवनी माध्यमिक विद्यालयका शिक्षक ५३ वर्षीय रमेश श्रेष्ठविरूद्ध ०८० साउन ३० गते जिल्ला प्रहरी कार्यालयमा उजुरी दर्ता भएको छ ।

पीडित बालिकाहरूलाई आरोपितले पटक पटक यौन दुर्व्यवहार गरेको भन्दै पीडित पक्षले साउन ३० गते जिल्ला प्रहरी कार्यालयमा उजुरी दिएको जिल्ला प्रहरी कार्यालयका डिएसपी ढुण्डीराज न्यौपानेले जानकारी दिनुभयो ।

पीडित बालिकाहरूको स्वास्थ्य परीक्षण साउन ३० गते धुलिखेल अस्पतालमा भयो । उजुरीका आधारमा आरोपितको खोजतलास भइरहेको छ भने पीडित बालिकाहरू हाल अभिभावककै संरक्षणमा रहेको डिएसपी न्यौपानेले बताउनु भयो ।


समित्रा आचार्य