समाचारहरू

१४ वर्षीया बालिकालाई विष्णुपुर गाउँपालिका–६ स्थित रुद्रनारायण माध्यमिक विद्यालयका सहायक कर्मचारी ३५ वर्षीय शङ्करकुमार यादवले यौन दुर्व्यवहार गरेको भन्दै पीडितका हजुरबुबाले चैत २५ गते जिल्ला प्रहरी कार्यालयमा उजुरी दिएका छन् ।

छात्रवृत्तिको फारम भर्न लेखा शाखाको कोठामा गएको बेला पीडित बालिकालाई आरोपितले चैत २१ गते यौन दुर्व्यवहार गरेको पीडित बालिकाले बताइन् ।

रुँदैकराउँदै लेखा शाखाको कोठाबाट निक्लिएर कक्षाकी महिला शिक्षकालाई घटनाबारे जानकारी गराएकी पीडितले अधिकांश शिक्षकहरूले घटना थाहा पाएपछि आफूलाई घरमा कसैलाई नभन्नु भनेर त्रास देखाएर पठाएको बताइन् ।

जिल्ला प्रहरी कार्यालय सप्तरीका एसपी अविनारायण काफ्लेले बैठकका लागि भारत र डिएसपी माधवप्रसाद काफ्ले घरविदामा जानु भएकाले उजुरी लिएर चैत २७ गते कार्यालय आउन इन्स्पेक्टर रामनारायण सिंहले फर्काएको पीडितका काकाले बताए ।

यसैबिच विद्यालय व्यवस्थापन समितिको पूर्ण बैठकले आरोपितलाई विद्यालयमा उपस्थित हुन प्रतिबन्ध लगाएको छ ।

सतनारायण यादवको अध्यक्षतामा चैत २३ गते बसेको बैठकले छात्राको निवेदन र वयानका आधारमा पीडितको न्याय निरूपण नभएसम्मका लागि उपस्थित हुन नपाउने गरी निलम्बन गरिएको बैठकमा सहभागी प्रधानाध्यापक तेजनारायण यादवले बताउनु भयो ।

मनोहरकुमार पोखरेल