समाचारहरू

पाँच वर्षीया बालिकालाई यौन दुर्व्यवहार गरेको घटनालाई पुस २० गते स्थानीयको मिलेमतोमा गाउँमै मिलाइएको घटना अहिले सार्वजनिक भएको छ ।

घटना गुपचुप रूपमा गाउँघरमै मिलाइए पनि गाउँका अगुवाले यस विषयमा सामाजिक सञ्जालमा पोष्ट गरेपछि र प्रशासनलाई खबर गरेपछि घटना व्यूँतिएको छ । घटना बारे प्रहरी र महिला तथा बालबालिका कार्यालयले गम्भीर चासो जनाएपछि घटना अहिले अनुसन्धान तहमा आइपुगेको छ ।

पीडित बालिकालाई चितवन गीतानगरका १८ वर्षीया मङ्गल ब्लोनले गत पुस २० गते यौन दुर्व्यवहार गरेको भन्दै जिल्ला प्रहरी कार्यालय चितवनले आरोपितलाई पुस २२ गते गिरफ्तार गरेको छ ।

गाँउलेले युवालाई सजाय भन्दै सानो कट्टु मात्र लगाउन लगाएर 'कुखुरा बनाइ' उठबस गराएका थिए । 'आरोपितलाई पुस २२ गते नै हामीले गिरफ्तार गरी अनुसन्धान थालेका छौँ ।'-जिल्ला प्रहरी कार्यालय चितवनका एसपी दिपक थापाले भने-'घटनाको वास्तविक अवस्था बुझ्ने प्रयास गरिरहेका छौँ ।' यस घटनामा पीडित पक्षबाट हालसम्म उजुरी परेको छैन ।

उजुरी नपर्नुको कारण गाउँघरको घटना भएको र पीडित डराएको हुन सक्ने अनुमान गरिएको एसपी थापाले बताए । साथै उनले पीडित पक्षले जाहेरी नदिएपनि प्रहरी प्रतिवेदनको आधारमा अनुसन्धान प्रक्रिया अघि बढाइने बताए ।

पीडित बालिकाको स्वास्थ्य परीक्षणका लागि अस्पताल पठाउने तयारी भएको एसपी थापाले बताए ।

दिपेन्द्र अधिकारी