यौन दुर्व्यवहार गरेको कसुरमा चार वर्ष कैद सजायको फैसला

  ०७८ वैशाख १७ गते

१९ वर्षीया युवतीलाई यौन दुर्व्यवहार गरेको कसुरमा जिल्ला अदालतले अर्जुनचौपरी गाउँपालिका–३ का २७ वर्षीय ख्यामबहादुर नेपालीलाई चार वर्ष कैद सजायको फैसला सुनाएको छ ।

जिल्ला अदालत स्याङजाका न्यायाधीश सुर्यबहादुर थापाको वैशाख १५ गतेको इजलासले कसुर ठहर गर्दै आरोपितलाई चार वर्ष कैद सजाय र २५ हजार क्षतिपुर्तीको साथै ८ सय रुपियाँ पीडित राहत कोषमा जम्मा गर्नुपर्ने फैसला गरेको जिल्ला अदालत स्याङ्जाका श्रेस्तेदार विश्वप्रसाद रेग्मीले जानकारी दिनुभयो ।

पीडितलाई आरोपितले ०७७ कात्तिक २५ गते दुर्व्यवहार गरेको भन्दै पीडितले आरोपितविरुद्ध कात्तिक २६ गते जिल्ला प्रहरी कार्यालय स्याङजामा उजुरी दिएकी थिइन ।

पीडितको उजुरीपछि प्रहरीले आरोपितलाई गिरफ्तार गरी उनीविरुद्ध सरकारी वकिलको कार्यालय मार्फत जिल्ला अदालत स्याङजामा जबरजस्तीकरणी उद्योग शीर्षकमा मुद्धा दर्ता गरेको थियो ।

आरोपित जिल्ला अदालत स्याङजाको आदेशले मङ्सिर १७ गतेबाट पुर्पक्षको लागि जिल्ला कारागारमा रहेको श्रेस्तेदार रेग्मीले बताउनुभयो ।


तिलकुमारी थापा