यौन दुर्व्यवहार गरेको कसुरमा २२ दिन कैद सजायको फैसला

  ०८१ असोज १८ गते

११ वर्षीया बालिकालाई यौन दुर्व्यवहार गरेको कसुरमा जिल्ला अदालतले सुन्दरहरैंचा नगरपालिका-१२ खोर्सानेका ७३ वर्षीय नन्दलाल लुईटेललाई २२ दिन कैद सजायको फैसला गरेको छ ।

जिल्ला अदालतका न्यायधीश उद्धवप्रसाद भट्टराईको ०८१ असोज १६ गतेको इजलासले कसुर गरेको ठहर गर्दै कैद सजायसँगै १० हजार रुपियाँ जरिबाना र पीडितले पाउने गरी कसुरदारबाट २५ हजार रुपियाँ क्षतिपूर्ति भराउन आदेश भएको अदालतका सूचना अधिकारी हेमबहादुर बुढाथोकीले बताउनु भयो ।

पीडित बालिकालाई नन्दलालले ०८१ वैशाख १९ गते यौन दुर्व्यवहार गरेको आरोपमा पीडित पक्षले आरोपितविरुद्ध जेठ २२ गते प्रहरीमा दिएको उजुरी दिएको थियो ।

घटनाका दोषी नन्दलाललाई प्रहरीले जेठ २२ गते गिरफ्तार गरी जिल्ला अदालतमा ०८१ असार १३ गते यौन दुर्व्यवहार शीर्षकमा मुद्दा दर्ता गरेको थियो ।

जिल्ला अदालतका न्यायधीश उद्धवप्रसाद भट्टराईको ०८१ असार १४ गतेको इजलासले ५० हजार रुपियाँ धरौटी माग गरेको थियो ।

आरोपित सोही दिन धरौटी बुझाएर रिहा भएका थिए ।

पीडितको स्वास्थ्य परीक्षण कोशी अस्पतालमा ०८१ जेठ २२ गते गरिएको थियो ।


विनोद सुवेदी