यौन दुर्व्यवहार गरेको कसुरमा तीन महिना कैद सजायको फैसला

  ०८० माघ १८ गते

१२ वर्षीया बालिकालाई यौन दुर्व्यवहार गरेको कसुरमा जिल्ला अदालतले मानेभञ्ज्याङ गाउँपालिका-२ का २६ वर्षीय विजय राईलाई तीन महिनाको कैद सजायको फैसला गरेको छ ।

जिल्ला अदालतका न्यायाधीश गिरिराज गौतमको ०८० माघ १४ गतेको इजलासले कसुर गरेको ठहर गर्दै राईलाई कैद सजायसँगै १३ हजार रुपियाँ जरिबाना र २० हजार रुपियाँ क्षतिपूर्ति भराउन आदेश भएको अदालतका श्रेस्तेदार विनोदप्रसाद घिमिरेले बताउनु भयो ।

पीडित बालिकालाई आरोपितले ०८० भदौ १४ गते यौन दुर्व्यवहार गरेको आरोपमा पीडित पक्षले आरोपितविरूद्ध भदौ १५ गते जिल्ला प्रहरी कार्यालयमा उजुरी दिएको थियो ।

पीडित पक्षको उजुरीका आधारमा आरोपितलाई प्रहरीले भदौ १५ गते गिरफ्तार गरी सरकारी वकिलको कार्यालयमार्फत जिल्ला अदालतमा ०८० असोज ४ गते बालयौन दुर्व्यवहार शीर्षकमा मुद्दा दर्ता गरेको थियो ।

जिल्ला अदालतको आदेशमा आरोपित पुर्पक्षका लागि थुनामा थिए ।

पीडित बालिकाको स्वास्थ्य परीक्षण जिल्ला अस्पतालमा ०८० भदौ १५ गते गरिएको थियो ।


सरस्वती बानिया