समाचारहरू

१२ वर्षीया बालिकालाई यौन दुर्व्यवहार गरेको कसुरमा जिल्ला अदालतले सूर्योदय नगरपालिका–१० आरूबोटेका ३२ वर्षीय पर्वत राईलाई दुई महिना कैद सजायको फैसला सुनाएको छ ।

न्यायाधीश दीपककुमार दाहालको पुस २८ गतेको इजलासले कसुर गरेको ठहर गर्दै राईलाई दुई महिना कैद सजायको फैसला सुनाएको अदालतका सूचना अधिकारी फणिन्द्रराज भट्टराईले बताउनु भयो  ।

अदालतको सोही आदेशले कसुरदारबाट  पीडितले पाउने गरी १० हजार रुपियाँ क्षतिपूर्ति र २ सय रुपियाँ पीडित राहत कोषमा जम्मा भराउन आदेश भएको सूचना अधिकारी भट्टराईले बताउनु भयो ।

पीडित बालिकालाई ०७९ साउन २६ गते यौन दुर्व्यवहार गरेको आरोपमा पीडित पक्षले आरोपितविरूद्ध ०७९ साउन  २८ गते जिल्ला प्रहरी कार्यालयमा उजुरी दिएको थियो ।

आरोपितलाई प्रहरीले ०७९ साउन २८ गते गिरफ्तार गरी सोही दिन जिल्ला अदालतमा बलात्कार शीर्षकमा मुद्दा दर्ता गरी कारबाही अघि बढाएको थियो ।

पीडित बालिकाको स्वास्थ्य परीक्षण जिल्ला अस्पतालमा साउन २८ गते गरिएको थियो ।

बविता मैनाली