समाचारहरू

१४ वर्षीया बालिकालाई यौन दुर्व्यवहार गरेको कसुरमा जिल्ला अदालतले धरान उपमहानगरपालिका–११ का ३५ वर्षीय भीमबहादुर विश्वकर्मालाई दुई महिना कैद सजायको फैसला सुनाएको छ ।

जिल्ला अदालतका न्यायाधीश अर्जुन अधिकारीको ०७९ चैत २० गतेको इजलासले कसुर गरेको ठहर गर्दै कैद सजायसँगै पीडितले पाउने गरी ३० हजार रुपिया क्षतिपूर्ति र पीडित राहतकोषमा १ हजार २ सय रुपियाँ भराउन आदेश भएको अदालतका श्रेस्तेदार मोहनबहादुर अधिकारीले बताउनु भयो ।

अदालतको सोही आदेशले कसुरदारलाई ३० हजार रुपियाँ जरिबाना भराउन आदेश भएको श्रेस्तेदार अधिकारीले बताउनु भयो ।

पीडित बालिकालाई आरोपितले ०७९ साउन १ गते यौन दुर्व्यवहार गरेको आरोपमा पीडित पक्षले आरोपितविरूद्ध साउन २ गते इलाका प्रहरी कार्यालय धरानमा उजुरी दिएको थियो ।

आरोपितलाई प्रहरीले साउन २ गते गिरफ्तार गरी जिल्ला अदालतमा साउन २४ गते यौन दुर्व्यवहार शीर्षकमा मुद्दा दर्ता गरेको थियो ।

जिल्ला अदालतका न्यायाधीश अर्जुन अधिकारीको साउन २५ गतेको आदेशले आरोपित पुर्पक्षका लागि थुनामा थिए ।

पीडितको स्वास्थ्य परीक्षण जिल्ला अस्पतालमा ०७८ साउन २ गते गरिएको थियो ।

जयकृष्ण यादव