यौन दुर्व्यवहार कसुरमा तीन महिना कैद सजायको फैसला

  ०७९ असार २३ गते

१४ वर्षीया बालिकालाई यौन दुर्व्यवहार गरेको कसुरमा जिल्ला अदालतले सुरुङ्गा नगरपालिका–२ स्थित जनता आधारभूत विद्यालय भेडिया, हर्दियामा अध्यापनरत शिक्षक बोदे बसाईन नगरपालिका–१० का ४० वर्षीय पशुपतिकुमार यादवलाई असार २१ गते ३ महिना कैद, १० हजार रुपियाँ जरिबानाका साथै २० हजार रुपियाँ क्षतिपूर्ति भराउने फैसला गरेको छ ।

न्यायाधीश प्रमेश पोखरेलको इजलाशले यस्तो फैसला गरेको हो । सोही घटनाका अर्का आरोपित शिक्षक सिरहा लहान नगरपालिकाका ३५ वर्षीय रामकृष्ण यादवले सफाई पाउने फैसला भएको छ ।

पीडित बालिकालाई आरोपितले ०७४ चैतदेखि यौन दुर्व्यवहार गरेको भन्दै पीडितले इलाका प्रहरी कार्यालय कडरबोनामा ०७५ जेठ २६ गते उजुरी दिएकी थिइन् ।

इलाका प्रहरी कार्यालय कडरबोनाले जेठ २७ गते बाल यौन दुर्व्यवहारको उजुरी दर्ता गरी पशुपति यादवलाई गिरफ्तार गरेको थियो ।

पीडित बालिकाको स्वास्थ्य परीक्षण ०७५ जेठ २७ गते राजविराजस्थित गजेन्द्रनारायण सिंह अस्पतालमा गरिएको थियो ।

सप्तरी जिल्ला अदालतले पशुपति यादवलाई ०७५ असार २२ गते ६५ हजार रुपियाँ धरौटी राखी पुर्पक्षका लागि तारेखमा रिहा गरेको थियो ।

अदालतमा ०७६ जेठ २४ गते हाजिर भएका अर्का आरोपित रामकृष्णलाई पनि अदालतले ६५ हजार रुपियाँ धरौटी राखी पुर्पक्षका लागि तारेखमा रिहा गरेको थियो ।


मनोहरकुमार पोखरेल