समाचारहरू

चार जना बालिकालाई यौन दुर्व्यवहार गरेको कसुरमा जिल्ला अदालतले हतुवागढी गाउँपालिका–३ सिन्द्राङका ३७ वर्षीय पूर्णकुमार राईलाई एक वर्ष पाँच महिना कैद सजायको फैसला सुनाएको छ ।

जिल्ला अदालतका न्यायाधीश गेहेन्द्रराज पन्तको साउन २३ गतेको इजलासले कसुर गरेको ठहर गर्दै कैद सजायसँगै ३१ हजार ५ सय रुपियाँ जरिबाना र पीडितले पाउने गरी ७० हजार रुपियाँ क्षतिपूर्ति भराउन आदेश भएको अदालतका श्रेस्तेदार मोहन घिमिरेले बताउनु भयो ।

आरोपितले १३ वर्षीया दुई जना र १५ वर्षीया दुई गरी चार जना बालिकाहरूलाई ०७९ मङ्सिर १० गते, १३ गते, १५ गते र २८ गते यौन दुर्व्यवहार गरेको आरोपमा पीडित पक्षले अरोपितविरुद्ध ०७९ पुस २८ गते जिल्ला प्रहरी कार्यालयमा उजुरी दिएको थियो ।

पीडित पक्षको उजुरीका आधारमा प्रहरीले आरोपितलाई पुस २८ गते गिरफ्तार गरी कारबाही अघि बढाएको थियो ।

जिल्ला अदालतको ०७७ माघ २२ गतेको आदेशमा आरोपित पुर्पक्षका लागि थुनामा थिए । बालिकाहरूको स्वास्थ्य परीक्षण जिल्ला अस्पतालमा ०७९ पुस २९ गते गरिएको छ ।

गणेश विष्ट