समाचारहरू

भूकम्पले विद्यालय भत्काएको २० महिना भयो । तर, नुवाकोटमा भत्किएका विद्यालयहरूको निर्माणले तीव्रता नपाउँदा विद्यार्थीहरू यो वर्षको चिसोमा पनि टहरामै बस्न बाध्य भएका छन् । सरकारी तहबाट जिल्लामा एउटा पनि विद्यालय भवन निर्माण थालिएको छैन भने गैरसरकारी संस्थाहरूले निर्माण गरिरहेका केही विद्यालय भवन पनि निर्माण सम्पन्न नभएको कारण विद्यार्थीहरू टहरामै बस्न बाध्य भएका हुन् ।

नुवाकोटका ४ सय ५४ वटा विद्यालयमा कुनै कुनै कक्षा कोठा नभत्किएको एउटै विद्यालय छैन भने अधिकांश विद्यालय शतप्रतिशत भत्किएका थिए । अहिलेसम्म १३ वटा मात्र विद्यालय निर्माण सम्पन्न भएकोमा पनि विद्यालय पूर्ण रूपमा निर्माण गरिएको नभएर तीन/चार कोठाका दरले निर्माण गरिएको जिल्ला शिक्षा अधिकारी चन्द्रबहादुर खड्काले बताए । ५७ वटा विद्यालय भने निर्माणको क्रममा रहेको उनले बताए ।

जाइका, रुम टु रिड, अल ह्याण्डस्, राउण्ड टेबललगायतका संस्थाले नुवाकोटका विद्यालय पुनर्निर्माणमा सहयोग गरिरहेका छन् । गैरसरकारी संस्थाहरू तथा दातृ निकायले थोरै सङ्ख्यामा विद्यालय पुनर्निर्माणको जिम्मा लिएको र सरकार आफैँले विद्यालय पुनर्निर्माण नथालेको कारण जिल्लाका ६७ हजार विद्यार्थीहरू मध्ये अधिकांश विद्यार्थी टहरामा नै पढ्न बाध्य भएका हुन् ।

नवदीप श्रेष्ठ