यार्सा सङ्कलनले गर्दा अधिकांश विद्यालय बन्द

  ०७४ जेठ ८ गते

जिल्लाको उत्तरी भेगका विद्यालय एक महिनादेखि बन्द गरिएका छन् । अभिभावकसँगै विद्यालय जाने उमेरका बालबालिका यार्सा सङ्कलन गर्न लेकतिर गएपछि विद्यालय बन्द गरिएका हुन् । उत्तरी भेगका काँडा मावि, धलौन माविलगायतका विद्यालय वैशाख पहिलो हप्तादेखि बन्द गरिएका हुन् ।

अधिकांश विद्यार्थी यार्सा सङ्कलन गर्न लेकतिर हिँडेपछि विद्यालय बन्द गर्नुपरेको काँडा माविका शिक्षक गोरख बोहोराले बताए । उनले भने-'विद्यार्थीहरू कोही आउँदैनन् । सबै लेकतिर यार्सा टिप्न हिँडेका छन् ।'

बन्द गरिएका विद्यालय विद्यार्थी वेशी झरेपछि असार अन्तिमतिर मात्र खुल्ने जानकारी प्राप्त भएको छ । उत्तरी भेगमा पर्ने काँडा गाउँपालिका, सुर्मा गाउँपालिका, छविस पाथीभेरा गाउँपालिका, तल्कोट गाउँपालिका र दुर्गावली गाउँपालिका अन्तर्गत पर्ने अधिकांश विद्यालय यतिखेर बन्द गरिएका छन् ।

उत्तरी भेगमा अवस्थित दुरदराजका ती विद्यालय वर्षेनी तीन महिना बन्द हुने गर्दछन् । वैशाख पहिलो हप्ता विद्यालय भर्ना भइ यार्सा सङ्कलन गर्न लेकतिर हिँडेका विद्यार्थी असारमा मात्र फर्कने गर्दछन् ।

आर्थिक अवस्था कमजोर भएका कारण विद्यालय पढ्ने बालबालिका यार्सा सङ्कलन गरी आर्थिक उपार्जन गर्ने गर्दछन् । विद्यार्थीहरू तीन महिना विद्यालय उपस्थित नभएपछि पाठ्यक्रमको पढाइ अधुरो रहने भएकाले विद्यार्थीले परीक्षामा कम अङ्क ल्याउने गरेका शिक्षकहरू बताउँछन् ।

यस भेगमा १० वर्षमा बालबालिकादेखि ६० वर्ष उमेर समूहका ज्येष्ठ नागरिकसमेत यार्सा सङ्कलनमा गर्न जाने गर्दछन् । ज्येष्ठ नागरिकभन्दा बालबालिकाले नै यार्सा गुम्बा बढी टिप्ने भएकाले यार्सा टिप्ने समयमा अभिभावकले आफ्ना बालबालिकालाई समेत यार्सा टिप्न लेकतिर लग्ने गर्दछन् । मतदाता नामावलीमा नाम नभएका विद्यार्थी स्थानीय तह निर्वाचनको समयमासमेत घर नर्फकने स्थानीयहरू बताउँछन् ।


प्रकाश विक