समाचारहरू

मन्थली नगरपालिका–६ भलुवाजोरकी कुटपिट गरी बाँधेर यातना पाएकी १३ वर्षीया बालिकालाई ०७८ चैत ६ गते अनौपचारिक क्षेत्र सेवा केन्द्र (इन्सेक) ले आर्थिक सहयोग गरेको छ ।

इन्सेकको पीडित सहायता कार्यक्रम अन्तर्गत इन्सेक जिल्ला प्रतिनिधिको पहलमा सो सहयोग गरिएको  हो ।

पीडित परिवारलाई मानव अधिकार संरक्षण सञ्जाल रामेछापका संयोजक अधिवक्ता पाण्डव प्रसाईँले इन्सेकको तर्फबाट सहयोग स्वरुप प्राप्त ५ हजार रुपियाँ पीडितका बुवालाई प्रदान गर्नुभयो ।

पीडित बालिकालाई गैर दलित समुदायको घरमा प्रवेश गरेको आरोपमा कुटपिट गर्नुका साथै ०७८ फागुन ३० गते अपराह्नदेखि २१ घण्टासम्म बाँधेर राखिएको थियो ।

पीडित परिवारले चैत २ गते जिल्ला प्रहरी कार्यालय रामेछापमा अपहरण तथा शरीर बन्धनको मुद्दा दर्ता गरेको छ ।

साथै जातीय विभेदविरुद्धको मुद्दा दर्ताको प्रक्रिया पनि अघि बढेको छ ।

घटनामा संलग्नलाई कारबाहीको माग

यसैबीच इन्सेकको सहजिकरणमा गठित मानव अधिकार संरक्षण  सञ्जाल रामेछापले दलित बालिका माथि भएको जातीय विभेद सहितको अमानवीय व्यवहारको घटनमा संलग्नलाई कारबाहीको माग गरेको छ ।

मानव अधिकार संरक्षण सञ्जाल रामेछापकाले ०७८ चैत ६ गते एक विज्ञप्ति जारी गरी सामाजिक रूपमा हुने यस्ता घटनाका दोषीलाई कारबाही गर्न माग गरेको छ ।

सञ्जालले घटनालाई गम्भीरता पूर्वक लिई पीडकलाई कारबाहीको दायरमा ल्याउन माग गरेको हो ।

सञ्जालका संयोजक पाण्डव प्रसाईँले हस्ताक्षर गरी जारी गर्नुभएको विज्ञप्तिमा कुनै पनि प्रभाव तथा दबाबमा नपरी घटनाको निष्पक्ष अनुसन्धान गर्न माग गरिएको छ ।

विज्ञप्तिमा यस्ता खाले घटना दोहोरिन नदिन सामाजिक सचेतनाका कार्यक्रम सञ्चालन गर्न समेत सरोकारवाला निकायसँग माग गरिएको छ ।

मन्थली नरपालिका–६ की एक १३ वर्षीय बालिकालाई गैरदलितको घरमा पसेको आरोपमा गत चैत ३० गते २१ घण्टासम्म बाँधेर कुटपीट गरिएको थियो । घटनाका आरोपीलाई प्रहरीले गिरफ्तार गरेर अनुसन्धान जारी राखेको छ ।

नबराज पथिक