मौन अवधिमा निर्वाचन आचारसंहित उल्लङ्घन बढ्दो

  ०७९ वैशाख २९ गते

मौन अवधिमा निर्वाचन आचारसंहित जुम्लामा बढेको छ । मौन अवधिमा यहाँका विषेशगरी ठूला दलका नेताहरू राति गाउँबस्तीमा पस्ने गरेका छन् ।

ठूला राजनीतिक दल नेपाली काँग्रेस, नेकपा माओवादी केन्द्र, नेकपा एमाले र समाजवादी पार्टीका नेताहरूले निर्वाचन आचारसंहित उल्लङ्घन गर्दै आएको मानव अधिकार रक्षक सञ्जाल, जुम्लाका अध्यक्ष राजबहादुर महतले बताउनु भयो । एक पार्टीले अर्काे पार्टीलाई गाउँबस्तीमा छिर्न नदिनका लागि राति पार्टीका कार्यकर्ताहरू गस्ती र सेन्ट्री बस्ने गरेका छन् ।

हिमा गाउँपालिका–२ ओदी गाउँमा वैशाख २८ गते राति नेपाली काँग्रेसका गाउँपालिका अध्यक्षका उम्मेदवार लक्ष्मण शाही गाउँमा पस्न खोजेपछि समाजवादी पार्टीका कार्यकर्ताले बाटोमै रोकेका थिए । उम्मेदवार शाही गाडी नै लिएर गाउँ पस्न खोजेपछि गाडीका सिसा फुटाउनुका साथै पाग्राको हावा फुस्काई दिएका छन् ।

यस्तै गुठीचौर गाउँपालिका–३ गज्याङ्कोट गाउँमा वैशाख २८ गते राति सामाजवादी र काँग्रेस कार्यकर्ता बीच झडप हुँदा समाजवादीका कार्यकर्ता जगदीश कठायत सामान्य घाइते भएको स्थानीय रामप्रकाश बिकले बताउनु भयो ।

चन्दननाथ नगरपालिक–३ बुढ्थापामा नेपाली काँग्रेसका नेता कार्यकर्ता वैशाख २७ गते राति गाउँमा पस्न खोजेपछि माओवादी केन्द्रका कार्यकर्ताले रोक्नुका साथै भिडियो सामाजिक सञ्जालमा सार्वजनिक गरेका थिए । गाउँमा पैसा बाडेर भोट किन्न खोजेको भन्ने माओवादी केन्द्रका कार्यकर्ताको आरोप छ । तर नेपाली काँग्रेसका नेता दिलबहादुर महतले बेलुका ७ बजे आप्mना नातेदारका कहाँ भेटघाटमा मात्रै गएको दावी गर्नु भएको छ ।

चन्दननाथ नगरपालिका–७ मिचा गाउँमा वैशाख २८ गते राति समाजवादी र स्वतन्त्र उम्मेदवार राजुसिंह कठायतका कार्यकर्ता गाउँमा पस्न खोजेपछि नेपाली काँग्रेसका कार्यकर्ताले रोकेका थिए । निर्वाचनको मौन अवधिमा आचारसंहिता बढ्ने, उल्लङ्घन भएपनि निर्वाचन अधिकृतको कार्यालयले भने निर्वाचन आचारसंहिताको उजुरी नआएको भन्दै टार्दै मुखदर्शक बनेको मतदाताले बताउने गरेका छन् । यहाँका एक नगरपालिका र सात गाउँपालिकाका निर्वाचन अधिकृतको कार्यालयमा निर्वाचन आचारसंहित सम्वन्धी कुनै पनि उजुरी नपरेको देखिएको छ ।

मुख्य निर्वाचन अधिकृतको कार्यालय जुम्लाका सहायक निर्वाचन अधिकृत तोयानाथ उपाध्यायले शिक्षकहरूले आचारसंहिता विपरीत कार्यहरूमा संलग्न भएको भन्ने कहि कतैबाट उजुरी नपरेको र निर्वाचन आचारसंहिता विपरीत कार्यमा संलग्न भएको भन्ने उजुरी आएको खण्डमा कारवाही प्रक्रिया अगाडि बढाउने बताउनु भयो ।

 


मानदत्त रावल