समाचारहरू

कुम्पुर गाविस-८ स्थित बागबच्छला आधारभूत विद्यालयका शिक्षक ३७ वर्षीय गणेश श्रेष्ठलाई नेत्रविक्रम चन्द 'विप्लव' नेतृत्वको नेकपा माओवादी निकट विद्यार्थी सङ्गठन अनेरास्ववियु क्रान्तिकारीका विद्यार्थीहरूले पुस ११ गते मोसो दलेर दुर्व्यवहार गरेका छन् ।

विद्यालयमा हाजिर भएर परीक्षामा गार्ड बसेको बेला सोही विद्यालयका विद्यार्थीहरूले मोसो दलेर जुत्ताको माला लगाएको अनेरास्ववियु क्रान्तिकारीका जिल्ला अध्यक्ष बद्री अधिकारीले पुस ११ गते नै विज्ञप्ति प्रकाशन गरी जानकारी दिएका छन् ।

केही अभिभावक आएर विद्यालयमा पढाउने नैतिकता नभएको भन्दै विद्यालय छाड्न शिक्षक श्रेष्ठलाई दबाव दिएपछि शिक्षक श्रेष्ठले विद्यालय छाडेर सदरमुकाम गएको विद्यालयका प्रधानाध्यापक इन्द्र श्रेष्ठले जानकारी दिए ।

एक महिलालाई बलात्कार प्रयास गरेको आरोपमा शिक्षक श्रेष्ठलाई ०७३ मङ्सिर २३ गते प्रहरीले गिरफ्तार गरेकोमा जिल्ला अदालतको पुस ७ गतेको आदेशले ३५ हजार रुपियाँ धरौटीमा रिहा भएका थिए ।

धरौटीमा रिहा भएपछि विद्यालय हाजिर हुन गएका शिक्षकको नैतिकतामाथि समेत प्रश्न उठाउँदै केही अभिभावकसमेत मिलेर अखिल क्रान्तिकारीमा आबद्ध विद्यार्थीले दुर्व्यवहार गरेको जनाइएको छ ।

सीताराम अधिकारी