मोसो दलेको आरोपमा पाँच जना गिरफ्तार

 

सुनसरी जिल्ला, धरान उपमहानगरपालिका-१२ स्थायी घर भइ हाल मोरङको बेलबारी नगरपालिका-११ लक्ष्मीमार्गमा बस्दै आएका ७५ वर्षीय ज्येष्ठ नागरिक हरिबहादुर विष्ट र उहाँकी बुहारी ३७ वर्षीया सरस्वती बस्नेत (विष्ट) लाई जेठ ४ गते  मोसो दलेको आरोपमा प्रहरीले पाँच जनालाई गिरफ्तार गरेको छ ।

मोसो दलेको घटनामा संलग्न भएको आरोपमा प्रहरीले बेलबारी नगरपालिका-११ का ४० वर्षीय माधव बास्तोला, ४२ वर्षीय नगेन्द्र मिश्र, ६२ वर्षीय मोहन घिमिरे, ३१ वर्षीया सङ्गीता लुइँटेल र  ३० वर्षीया पुतली खवासलाई गिरफ्तार गरेको जिल्ला प्रहरी कार्यालयका एसपी नवराज कार्कीले बताउनु भयो ।

घटनाका आरोपितविरूद्ध पीडित पक्षले ०८१ जेठ ५ गते इलाका प्रहरी कार्यालय, वेलवारीमा उजुरी दिएपछि आरोपितलाई अनुसन्धानका लागि घरबाटै गिरफ्तार गरेको एसपी कार्कीले बताउनु भयो ।

बेलबारी नगरपालिका-११ स्थित सुम्निमा चोकबाट जुरातर्फ जाने सडक निर्माणका क्रममा स्थानीय र विष्ट परिवारबीच विवाद भएको थियो । विवादकै क्रममा मोसो दलेर ससुरा बुहारीमाथि अमानवीय व्यवहार गरिएको एसपी नवराज कार्कीले बताउनु भयो ।

कोशी प्रदेश सरकारको बहुवर्षीय योजनाअन्तर्गत करिब साढे १२ किलोमिटर लम्बाइ र २४ फिट चौडाइको सडक निर्माण तीन वर्ष अघिबाट सुरु गरिएको थियो । विष्टको जग्गा हुँदै बाटो बन्ने क्रममा छ । निर्माणाधीन सडकले आफ्नो दुवैतर्फको जग्गा काट्ने भन्दै विष्टले विरोध गर्दै आउनु भएको छ ।

जग्गा धनीसँगको विवादका कारण सडक निर्माणले गति लिन सकिरहेको छैन । उक्त सडक निर्माण तत्काललाई अघि नबढाउन र जग्गा धनीसँग सहमति गरेर मात्रै काम गर्न उच्च अदालत विराटनगरले ०८१ वैशाख ६ गते आदेश दिएको छ ।

अदालतको आदेशपछि पनि जबरजस्ती काम अघि बढाउन खोजेको भन्दै जग्गा धनी विष्टका परिवार विरोधमा उत्रिएका थिए । उनीहरूले तत्काललाई सडकको काम अघि नबढाउन आग्रह गरेका छन् । त्यही विषयलाई लिएर विष्ट परिवार र स्थानीयबीच विवाद भएको प्रहरीले जनाएको छ ।

 


विनोद सुवेदी