मोर्चाका कार्यकर्ताद्वारा अस्पताल, यात्रुबाहक बस र होटलमा तोडफोड

 

संयुक्त लोकतान्त्रिक मधेसी मोर्चाका कार्यकर्ताहरूले असोज ३ गते साँझ ब्ल्याक आउटको समयमा बत्ति बालेको आरोपमा एउटा अस्पताल, पाँच ओटा रात्री बस र एउटा होटलमा ढुङ्गा प्रहार गरी तोडफोड गरेका छन् ।

मोर्चाका कार्यकर्ताहरूले लहान नपा-१ स्थित सहिद चोकमा रोकिराखेको ना. ५ ख ४९४९ नम्बरको विराटनगरबाट काठमाडौँ हिँडेको रात्री बसमा ढुङ्गा हानी अगाडिको सिसा फुटाई क्षति पुर्‍याएका हुन् । त्यसैगरी मोर्चाका कार्यकर्ताहरूले लहान नपा-३ स्थित बलान खोला छेउमा रोकिराखेको धरानबाट काठमाडौँ छुटेको ना. ६ ख १४४५, काकडभिट्टाबाट बुटबल जाने लु. १ ख ८७०१, विराटनगरबाट काठमाडौँ जाने ना. ५ ख ४३२१ र राजबिराजबाट काठमाडौँ जाने ना. ६ ख ७२२८ नम्बरको बसमा ढुङ्गा प्रहार गरी अगाडिको सिसा फुटाएको प्रहरीले जनाएको छ ।

मोर्चाका कार्यकर्ताले ब्ल्याक आउटमा बत्ति बालेको आरोपमा लहान नपा-३ स्थित अल्फ्रेड हेल्थकेयर एण्ड डाइगनोष्टिक सेन्टर प्रालिको इमरजेन्सी कक्षको अगाडिको सिसा समेत फुटाएको इलाका प्रहरी कार्यालय लहानका डिएसपी राजकुमार केसीले जानकारी दिए ।

मोर्चाकै कार्यकर्ताहरुले सोही नपा-४ स्थित होटल इष्ट प्वाइन्टको झयालका सिसासमेत फुटाएका केसीले बताए ।


दुर्गा परियार