समाचारहरू

मेडिकल सञ्चालकलाई कुटपिट गरेको विष्यमा प्रदेश प्रहरीद्वारा छानबिन समिति गठन

प्रदेश २ प्रहरी कार्यालय जनकपुरले जेठ १२ गते बिहान बीरगंज महानगरपालिका–८ मा प्याथो सर्जिकल हाउसमा प्रवेश गरी जिल्ला प्रहरी कार्यालय पर्साका डिएसपी प्रल्हाद कार्कीले त्यहाँ कार्यरत २५ वर्षीय अफरोज अहम्मदलाई कुटपिट गरेको घटनालाई छानबिन गर्न एउटा समिति बनाएको छ ।

प्रदेश प्रहरी कार्यालयका एसपी कृष्ण प्रसाईको संयोजकत्वमा घटनाको छानबिन गर्न समिति बनाइएको प्रदेश प्रहरी कार्यालयका डिआइजी धिरज सिंहले बताउनु भयो ।

प्रदेश प्रहरी कार्यालयले जेठ १३ गते एक विज्ञप्ति जारी गर्दै बीरगंजमा भएको गैरव्यवसायिक घटनाको छानबिन गरी दोषी देखिएमा प्रहरी नियमावली अनुसार कारवाही गरिने जनाएको छ ।

जेठ १२ गते बिहान जिल्ला प्रहरी कार्यालयका डिएसपी प्रल्हाद कार्कीले १६ दिनदेखि जारी निषेध आदेश कडा बनाउन बजार बन्द गराउने क्रममा मोबाइलबाट भिडियो रेकर्ड गरेको आशङ्कामा डिएसपी कार्कीले प्याथो सर्जिकल नामक मेडिकल पसलमा प्रवेश गरी अहम्मदलाई कुटपिट गरेको आरोप छ ।

‘छेउको किराना पसल बन्द गराइरहनु भएको थियो । यही बेला मेरो ‘स्टाफ’ पसल खोल्न आयो । पसलको सटर खोल्दै ऊ भिडियो कलमा कुरा गरिरहेको थियो ।’–सर्जिकल हाउसका प्रमुख करण पटेलले भन्नु भयो–‘डिएसपीज्यूलाई भिडियो खिचे जस्तो लागेछ । उहाँ एकाएक पसलमा आएर सोध्दै नसोधी कुटपिटमा उत्रिनु भयो ।’

जिल्ला प्रहरी कार्यालय पर्साका एसपी बेलबहादुर पाण्डेले गल्ती नै भएको स्वीकार गर्नु भएको छ । ‘लकडाउनमा कडाइ गर्न खोज्दा यो घटना भएको हो ।’–उहाँले भन्नु भयो । यसमा अर्को कुनै नियत नरहेको भन्दै यस्ता घटना हुन नदिने गरी सच्याउने उहाँले बताउनु भयो ।

कृष्णचन्द्र लामिछाने