समाचारहरू

मुहान सुकेपछि गाउँबस्तीमा खानेपानीको समस्या भएको छ । भूकम्पले ठाउँ ठाउँमा जमिन भासिएकाे कारण याे सुक्खा खडेरीमा मुहानमा पानी सुकेपछि खानेपानीको समस्या भएको हो । भेरी नगरपालिका, नलगाड नगरपालिका, कुशे गाउँपालिका र बारेकोट गाउँपालिकाका विभिन्न गाउँ बस्तीमा पानीका मुहान सुकेपछि खानेपानीको हाहाकार भएको हो ।

गत कात्तिक १७ गते मध्यरात गएको भूकम्पले पानीका मुहान भासिएको थियो । मुहान भासिएपछि पानी घट्दै जाँदा चिन्तित बनेका गाउँबस्तीका नागरिकहरु सुक्खा खडेरीमा मुहानै सुकेपछि धारामा पानी आउन बन्द भएको छ । मुहानमै पानी सुकेपछि खानेपानीको समस्या भएको हो ।

नलगाड नगरपालिका–४ बाहुसेखोला स्थित जुम्ली गारे खानेपानी मुहान सुक्खा खडेरीले पानी सुकेपछि सो गाउँ १५ घरपरिवार खानेपानीकाे समस्यामा परेका छन् । भूकम्पले घरवारविहीन भएर खानाको जोहो गर्न मुस्किल भएका जनतालाई धारामा पानी नआएपछि समस्या भएकाे स्थानीय हेरम्व थापाले बताउनु भयो ।

नलगाड नगरपालिका–४ चच्चुलाईन खानेपानी मुहान र पाल्ता खानेपानी मुहान पनि भूकम्पका कारण जमिन फाँटेर सुक्न थालेका छन् । मुहानमा पानी आउन छाडेपछि कोटीगाउँका ४५ घरपरिवार, भात्चिउराका ३५ घरपरिवार, डिम्रापानी मुहानको प्रयोग गरेका १४ घर दलित परिवारलाई समस्या भएको छ । त्यसैगरी प्याराधारा खानेपानी मुहानमै पानी सुकेपछि उक्त गाँउबस्तीमा खानेपानीको हाहाकार भएको नलगाड नगरपालिका–४ का वडा अध्यक्ष बद्री बहादुर पन्तले बताउनु भयो ।

 

पन्चासे खानेपानी,लेईखोरे खानेपानी, पुरानागाउँ खानेपानी मुहानमा पानी आउन छोडेपछि घरआँगनको धारामा पानी खाएका १ सय ४० घरपरिवारले अहिले नाउला खाेलाको  पशुचौपायले पिउने दुषित पानी पिउन खान बाध्य भएका छन् । नलगाड नगरपालिकाको १ देखि ७ नम्बर वडाका स्थानीय नागरिकले खानेपानीको समस्या भोग्नु परेको नलगाड नगरपालिका–५ का  स्थानीय प्रेमबहादुर शाहीले बताउनुभयो ।

विगत वर्ष यस्तो समस्या थिएन अहिले भूकम्पले जमिन भासिएपछि पानीको मात्रा कम हुँदै गएकोले सुख्खा खडेरीमा मुहानमै पानी सुकेका कारण खानेपानीको समस्या भएको हो । अझै केही समय पानी परेन भने सुक्खा खडेरी बढ्दै गयो भने नाउला र डोप्कामा भएको पानी सुकेपछि झन हाहाकार हुने देखिएको उहाँको भनाइ छ  ।

बासुदेव शर्मा