समाचारहरू

मतपेटिका शिलबन्दी गर्दा मुचुल्का गरिएको भन्दा बढी मतपत्र भेटिएपछि जिल्लाको मतगणना कार्य मङ्सिर १६ गते विहानैदेखि रोकिएको छ ।

हिमाली गाउँपालिका–६ धिम मतदान केन्द्रको मतपेटीकामा मुचुल्का गरिएको भन्दा ३० मत बढी भेटिएपछि मतगणना रोकिएको मुख्य निर्वाचन अधिकृत ढाकाराम पाैडेलले बताउनु भयो ।

प्रतिनिधि सभाको मतगणना गर्दा मतदान अधिकृतले मुचुल्का गरेको भन्दा ३० मत बढी गणनामा देखिएको हो ।

हिमाली गाउँपालिका–६ मतदान केन्द्रको (क) र (ख) गरी कुल  १ हजार ७ सय २६ मतदाता रहेकोमा मुचुल्कामा १ हजार ४ सय ५० मत खसेको उल्लेख गरिएको छ । हिमाली गाउँपालिका नेपाली कांग्रेसका उम्मेदवार बद्री पाण्डेको गृह पालिका हो ।

हिमाली गाउँपालिका–६ मा नेपाली कंग्रेसबाट प्रतिनिधि सभाका उम्मेदवार पाण्डे नेतृत्वको टोली आएर बुथ कब्जा गरी मतदान कार्य सम्पन्न भइसकेपछि मतपेटिका कोठामा लिएर ६ सय बढी मत खसाइएको आरोप नेकपा एमालेले लगाउँदै आएको छ ।

मतदान अधिकृत लगायतका कर्मचारी, सुरक्षा निकाय सबैलाई प्रभावमा राखेर एकलौटी कब्जा शैलीमा मतदान गरेपछि शिलबन्दी गर्दा संख्या एकीन नभएको र बदमासी गरेर मतदान गरिएको प्रष्ट भइसकेकोले छानविनपश्चात मात्रै मतगणना सुरु गरिनु पर्ने नेकपा एमालेका प्रतिनिधि सभा सदस्यका उम्मेदवार कर्णबहादुर थापाको भनाइ छ ।

हालसम्म बडीमालिका नगरपालिका–१ को (क) बुथ बाहेक सबै वडाको मतगणना भइसकेको, हिमाली गाउँपालिका वडा नम्बर ५ र ७ बाहेकको मत गणना सकिएको भएपनि सोही गाउँपालिका वडा नम्बर ६ को मत गणनामा विवाद देखिएपछि मतगणना कार्य स्थगित भएको मुख्य निर्वाचन अधिकृत पौडेलले बताउनु भयो ।

हालसम्मको मतगणनाको नतिजा अनुसार प्रतिनिधिसभा तर्फ नेपाली कांग्रेसका उम्मेदवार  बद्री पाण्डेले ५ हजार ३ सय ९९ मत प्राप्त गर्नु भएको छ भने नेकपा एमालेका उम्मेदवार कर्णबहादुर थापाले ४ हजार १ सय ३० मत प्राप्त गर्नु भएको छ ।

हालसम्म नेपाली कांग्रेसका उम्मेदवार पाण्डेले १ हजार २ सय ६९ मतको अग्रता लिनु भएको छ ।

पदमबहादुर सिंह