समाचारहरू

अनौपचारिक क्षेत्र सेवा केन्द्र (इन्सेक) र नर्बेजियन राजदुताबासको सयुंक्त टोलीले मुगु जिल्लाको मानव अधिकारको अवस्थाबारे जिल्लाका सरोकारवालासँग छलफल गरेको छ ।

अनौपचारिक क्षेत्र सेवा केन्द्र (इन्सेक) क्षेत्रीय कार्यालय नेपालगञ्जका संयोजक भोला महत, प्रलेख अधिकृत नारयण सुबेदी, नर्बेजियन दुताबासका प्रतिनिधि क्यारोलिन र राजकुमार ढुङ्गानको संयुक्त टोलीले जिल्लाका सरोकारवालासँग मानव अधिकारको अवस्थाका सम्बन्धमा छलफल गरेको हो ।

प्रमुख जिल्ला अधिकारी उमाकान्त अधिकारीको कार्यकक्षमा मानव अधिकारको अवस्थासहित महिला तथा बालबालिका, स्वास्थ्य, शिक्षा, आर्थिक, सामजिक, सांस्कृतिक अधिकार र शान्ति सुरक्षाका विषयमा छलफल गरिएको हो ।

छलफलमा जिल्ला प्रहरी कार्यलयका डिएसपी भिमकिरण बोगटी, महिला तथा बालबालिका कार्यलयका निमित्त प्रमुख धान्ने बुढा, शिक्षा कार्यलयका निमित्त प्रमुख धनसुधन चौलागाईलगायतको सहभागिता थियो ।

अन्तक्रियामा प्रमुख जिल्ला अधिकारी उमाकान्त अधिकारीले कर्णालीमा विकासको अधिकारसँगै मानव अधिकारको कुरालाई सँगै समेटेर लैजानु पर्ने र विकास निर्माणका कार्य केन्द्रबाट नभई स्थानीय स्तरबाट माग भए अनुसार पारदर्शी रूपमा लगानी गरे मानव अधिकारको उपयोग नागरिकले पाएको अनुभूति हुने बताए ।

जिल्ला शिक्षा कार्यलयका निमित्त कार्यलय प्रमुख धनशुधन चौलागाईले सरकारले शिक्षा क्षेत्रमा जति लगानी गरेको भएपनि त्यसलाई उपभोग गर्न नागरिकस्तरबाट पनि आफ्नै सम्पति हो भनेर जर्गेना गनुपर्ने बताए ।

महिला तथा बालबालिका कार्यलयका निमित्त कार्यलय प्रमुख धान्ने बुढाका अनुसार जिल्लामा महिला हिंसाका घटना कार्यालयमा आउने गरेका र तिनीहरूका लागि सहयोग गर्ने गरिएको छ ।

जीवन सेजुवाल