मुगुका १८ मतदान केन्द्र अति सम्वेदनशील

 

जिल्ला सुरक्षा समितिले जिल्लाका १८ मतदान केन्द्र अति सम्वेदनशील रहेको जनाएको छ । ६० ओटा मतदान केन्द्रमध्ये सुरक्षा समितिले १८ अति सम्वेदनशील, १९ सम्वेदनशील र २३ सामान्यमा राखेको प्रमुख जिल्ला अधिकारी उमाकान्त अधिकारीले बताए ।

सदुरमुकाम गमगढी नजिक रहेको छाँयानाथ रारा नपा-१२ शोभा गाँउमा रहेको मतदान केन्द्रमा नेपाल कम्युनिष्ट पार्टीका कार्यकर्ताले ०७० को संविधान सभाको निर्वाचनमा सामान्य अवरोध गरेका थिए ।

यसैगरी ०७४ वैशाख ३१ गते सम्पन्न स्थानीय तहको निर्वाचनमा नेपाल कम्युनिष्ट पार्टीका कार्यकर्ताले मतपेटिकासहित सबै निर्वाचनका सामग्री लुटेका थिए ।

छाँयानाथ रारा नपा-१२ शोभा गाँउका नेपाली काङ्ग्रेस र बाम गठबन्धनका समर्थकलाई नेपाल कम्युनिष्ट पार्टीका कार्यकर्ताले मतदान केन्द्र खारेज गर्न दबाव दिँदै आएका छन् ।

प्रमुख जिल्ला अधिकारी उमाकान्त अधिकरीका अनुसार केही मतदान केन्द्रका मतदातालाई नेपाल कम्युनिष्ट पार्टीका कार्यकर्ताले धम्की दिएको जानकारी आफूले पाएको र निर्वाचन विरोधी गतिविधि गर्नेसँग सम्झौता नगरी आवश्यक कारबाही गरिने बताए ।


जीवन सेजुवाल