समाचारहरू

पुनरावेदन अदालत जुम्लामा विगत तीन महिनादेखि मुख्य न्यायाधीश नहुँदा सेवाग्राही मर्कामा परेका छन् ।

पुनरावेदन अदालत जुम्लाका मुख्य न्यायाधीश नहुँदा बेञ्च बस्न नसकेको र मुद्दा फैसला गर्नका लागि दुई जना न्यायाधीश आवश्यक पर्ने भएकाले एकजना न्यायाधीशको अनुपस्थितले इजलास नचलेपछि सेवाग्राही मर्कामा परेका हुन ।

पुनरावेदन अदालत जुम्लाका मुख्य न्यायधीश टङ्कबहादुर मोक्तान दाङ तुल्सीपुरस्थित पुनरावेदन अदालतमा काजमा रहेको र नेपालगञ्ज पुनरावेदन अदालतका न्यायाधीश वीरबहादुर डाँगीलाई पुनरावेदन अदालत जुम्लाको जिम्मेवारी दिएपनि उनको उपस्थिति नभई बेञ्च बस्न नसकेको पुनरावेदन अदालतका रजिष्टार माधव पौडेलले बताए ।

अर्को आदेश नभएसम्म पुनरावेदन अदालत जुम्लाको कामकाज गर्नेगरी सर्वोच्च अदालतले ०७३ असार १ गते गरेको निर्णय अनुसार न्यायाधीश डाँगीलाई पुनरावेदन अदालत जुम्लाको जिम्मेवारी प्रदान गरेको उनले बताए । उनले भने–‘फैसलाका लागि अङ्ग पुगेका मुद्दाहरू छन् । तर, न्यायाधीश नभएका कारण समयमा कानुनी सेवा प्रवाह गर्न सकिएको छैन । यस विषयमा पटकपटक सर्वोच्च अदालतमा पहल गर्दा पनि सुनुवाइ नभएको उनको भनाइ छ ।

न्यायधीश नभएका कारण ५१ थान मुद्दा पेशीमा राखिएपनि अन्तिम फैसला हुन नसकेको अधिवक्ता मिनबहादुर महतले बताए ।

पुनरावेदन अदालत जुम्लामा ६२ थान मुद्दा मध्ये पेशीमा चढेका ५१ थान मुद्दा मुख्य न्यायाधीश नभएका कारण अन्तिम सुनुवाइ हुन नसकेको कानुन व्यवसायीहरूको भनाइ छ ।

गएको आर्थिका वर्ष ०७२/०७३ मा ३९ थान मुद्दा जिम्मेवारी सरेर आएका र चालु आर्थिक वर्ष ०७३/०७४ मा २३ थान मुद्दा दायर भएको पुनरावेदन अदालत जुम्लाले जनाएको छ ।

मानदत्त रावल