मासपुरबासीले अनुदानको खाद्यान्न नपाएको गुनासो

ताँजाकोट गाउँपालिका–३ मासपुरमा खाद्यन्नको समस्या भएको छ । खाद्य व्यवस्था तथा व्यापार कम्पनी लिमिटेडको ढुवानी अनुदानको खाद्यान्न हालसम्म नपाएको स्थानीयले गुनासो गरेका छन् । लिमिटेडको खाद्यान्न बिक्री केन्द्र पुग्न एक दिन लाग्ने र खाद्यान्न बिक्री वितरणका विषयमा मासपुरबासीलाई थाहा नहुने भन्दै खाद्य समस्या हुने गरेको स्थानीयले गुनासो गरेका हुन् ।

स्थानीय दानबहादुर बुढाले विगत चारवर्षदेखि हालसम्म लिमिटेडको खाद्यान्न गाउँवासीले नपाएको गुनासो गर्नु भयो । उहाँले गाउँपालिका केन्द्र छप्रेलामा रहेको बिक्री केन्द्र मासपुर गाउँबाट पुग्न एक दिन पैदल लाग्ने र केन्द्रबाट खाद्यान्न बिक्रीका विषयमा जानकारी नहुने भएपछि सो खाद्यान्न पाउन वञ्चित हुँदै आएको बताउनु भयो ।

कतिपय स्थानीयलाई त बिक्री केन्द्रबाट ढुवानी अनुदानमा खाद्यान्न बिक्री हुन्छ भन्नेसम्म जानकारी नभएको पाइएको छ । उहाँले दुर्गमका लागि लिमिटेडले ढुवानीको व्यवस्था गरेर गाउँगाउँमा पु¥याउने व्यवस्था गर्न मासपुरवासीको माग रहेको बताउनुु भयो । कहिल्यै लिमिटेडको

खाद्यान्न नपाउने मासपुरवासीका लागि निश्चित कोटाको व्यवस्था गर्न लिमिटेडसँग स्थानीयले माग गर्नु भएको छ । मासपुरका स्थानीय खाद्यान्न खरिद गर्नु प¥यो भने बाजुरा र हुम्ला जिल्लाको सीमाना कवाडी पुग्ने गरेको उहाँले बताउनु भयो । यसरी खाद्यान्न खरिद गर्दा साढे दुई दिन लाग्ने गर्छ ।

विगत चार वर्षदेखि छप्रोलामा बिक्री केन्द्र स्थापना भएर ताँजाकोट गाउँपालिकाका लागि खाद्यान्न बिक्री गरिदै आएको छ । लिमिटेडको सिमकोट शाखाका निमित्त नवीन आचार्यका अनुसार यस बारेमा आफूलाई जानकारी नभएको र बुझेर खाद्यान्न नपाउने मासपुरवासीलाई प्राथमिकतामा राखेर खाद्यन्न बिक्री गर्न लगाउने बताउनु भयो ।

चालु आर्थिक वर्षमा बिक्री केन्द्रका लागि एक हजार क्विन्टल खाद्यान्न पैदल मार्गबाट कोटा निर्धारण गरिएकोमा हालसम्म २ सय ७० क्विन्टल ढुवानी भएको निमित्त प्रमुख आचार्यले बताउनु भयो । सो गाउँका करीव १ सय ५० जना स्थानीय नागरिक खाद्य सम्प्रभूताको अधिकारबाट बन्चित हुनु परेको स्थानीय बुढाले गुनासो गर्नु भयो ।


नन्द सिंह