मानव बेचबिखन तथा ओसारपसार घटनाका आरोपितविरुद्ध उजुरी दर्ता

२२ वर्षीया र २३ वर्षीया महिलालाई मानव बेचबिखन तथा ओसारपसार गरेको आरोपमा सिन्धुपाल्चोकको मेलम्ची नगरपालिका-७ घर भइ हाल बनेपा नगरपालिका-८ मा रहेको लामा सगरमाथा गेस्ट हाउस सञ्चालिका ४५ वर्षीया मनमाया तामाङविरुद्ध इलाका प्रहरी कार्यालय, बनेपामा ०८० भदौ २४ गते उजुरी दर्ता भएको छ ।

इलाका प्रहरी कार्यालय, बनेपाका डिएसपी रेशम बोहोराका अनुसार बनेपा नगरपालिका-८ मा रहेको लामा सगरमाथा गेस्ट हाउसमा पीडित महिलाहरूलाई यौन धन्दामा लगाउँदै आइरहेको सूचना पाएपछि अनुगमनमा जाँदा यौन धन्दामा लगाउँदै गरेको भेटिएको हो ।

पीडित पक्षले भदौ २४ गते इलाका प्रहरी कार्यालय, बनेपामा उजुरी दिएको थियो । प्रहरीले आरोपितलाई भदौ २२ गते नै गिरफ्तार गरेको डिएसपी बोहोराले जानकारी दिनुभयो ।

पीडित महिलाहरूको स्वास्थ्य परीक्षण भदौ २४ गते धुलिखेल अस्पतालमा भयो । प्रहरीले आरोपितविरुद्ध जिल्ला अदालतबाट भदौ २४ गते पाँच दिनको म्याद थप गरी अनुसन्धान सुरु गरिएको डिएसपी बोहोराले बताउनु भयो ।


सुमित्रा आचार्य