समाचारहरू

२६ वर्षीया महिलालाई मानव बेचबिखन तथा ओसारपसार गरेको आरोपमा शिवपुरी गाउँपालिका–१ तलाखुकी सोनाम भन्ने हेरिङ डोल्मा तामाङलाई प्रहरीले ०७९ चैत २६ गते गिरफ्तार गरेको छ ।

पीडित महिलालाई आरोपितले ०७३ वैशाख ३ गते ललाई फकाई सिन्धुपाल्चोक राम्चेका ३४ वर्षीय कुमार तामाङसँग भारु पाँच लाखमा खरीद गरी भारतको मुनिरकास्थित जिवि रोडमा कोठीमा चार महिना यौन व्यवसायमा जबर्जस्ती लगाएको जिल्ला प्रहरी कार्यालयका सूचना अधिकारी तथा डीएसपी खगेन्द्रबहादुर खड्काले जानकारी दिनुभयो ।

पीडितको तर्फबाट आरोपित नुवाकोट आउँदै गरेको भन्ने जानकारीको आधारमा डोल्मालाई विदुरबाट चैत २६ गते गिरफ्तार गरिएको थियो ।

पीडितले चैत २७ गते जिल्ला प्रहरी कार्यालय नुवाकोटमा उजुरी दिएकी थिइन् ।

उजुरीको आधारमा गिरफ्तार गरि अनुसन्धान थालिएको डीएसपी खड्काले जानकारी दिनुभयो ।

यस अघि नुवाकोट शिवपुरीकी २९ वर्षीया महिलाको उजुरीमा पनि डोल्मा प्रतिवादी रहेको र सोही घटनामा संलग्न कुमार तामाङको फैसलामा डोल्मालाई भेटिएको बखत मुद्धा चलाउने गरी फैसला भएकोले पुरक जाहेरी दर्ता गरि अनुसन्धान अघि बढाउन सहज भएको जिल्ला न्यायाधिवक्ता टेकराज भुसालले बताउनु भयो ।

बेचबिखनमा संलग्न कुमार तामाङलाई भने नुवाकोट जिल्ला अदालतले ०७५ कात्तिक १४ गते २० वर्ष कैद सजाय र ५० हजार रुपियाँ जरिबानाको फैसला गरेको थियो । हाल तामाङ थुनामा रहेको डीएसपी खड्काले जानकारी दिनुभयो ।

नवदीप श्रेष्ठ