समाचारहरू

२१ वर्षीया दुई जना, १९, वर्षीया, २४ वर्षीया, २५ वर्षीया र २६ वर्षीया ६ जना महिलाहरूलाई राम्रो जागिर लगाइदिने प्रलोभन देखाएर भारतको बाटो हुँदै दुवई लैजाँदै गरेको अवस्थामा केआई नेपाल र माइती नेपालको सहयोगमा रूपन्देही प्रहरीले बेलहिया नाकाबाट मङ्सिर १२ गते उद्दार गरेको छ ।

आरोपितले पीडित महिलाहरूलाई प्रलोभन देखाएर बेचबिखनको लागि विदेश पठाउन लागेको प्रहरीको आरोप छ ।

बेचबिखन कार्यमा संलग्न रहेको आरोपमा प्रहरीले रोहिणी गाउँपालिका-४ छिपागढकी ४० वर्षीया कौशिल्या कहारलाई बेलहियाबाट गिरफ्तार गरेको छ । काठमाडौँ नयाँ बसपार्कका अन्दाजी ३५ वर्षीय राजु क्षेत्री फरार रहेको प्रहरीले जनाएको छ ।

विदेश जान हिँडेका महिलाहरूसँग वैदेशिक रोजगारीमा जाँदा चाहिने पासपोर्ट, नागरिकतालगायतका कागजात केही पनि नभएको जिल्ला प्रहरी कार्यालयका डिएसपी डिल्लीनारायण पाण्डेले बताए ।

२१ वर्षीया दुई जना महिलालाई बेचबिखन गर्न खोजेको घटनाका आरोपित सिर्द्धार्थनगर नगरपालिका-१ बेलहियाका ४३ वर्षीय रामअवध गुप्ता, सिनपा-१३ हाटबजारका २९ वर्षीय सन्तोष मौर्यलाई मङ्सिर १३ गते गिरफ्तार गरेको प्रहरीले जनाएको छ ।

नुवाकोटको त्रिशुली स्थायी घर भई काठमाडौँ गङ्गबु बस्ने अन्दाजी ४० वर्षीया दीपा भण्डारी मगर फरार रहेको प्रहरीले जनाएको छ ।

आरोपितले पीडितद्वयलाई महिनाको १ लाख कमाई हुने भन्दै प्रलोभन देखाएर होटलमा राखेर बलात्कार गरेको आरोप छ । पीडितद्वयको स्वास्थ्य परीक्षण मङ्सिर १२ गते नै भिम अस्पताल भैरहवामा गरिएको जिल्ला प्रहरी कार्यालयका डिएसपी डिल्लीनारायण पाण्डेले बताए ।

रीमा बि.सी.