समाचारहरू

राष्ट्रिय मानव अधिकार आयोग क्षेत्रीय कार्यालय नेपालगञ्जले दाङका सरकारी कार्यालयहरूलाई मानव अधिकार राष्ट्रिय कार्ययोजना कायान्वयनकालागि ध्यानाकर्षण गराएको छ ।

आयोगका क्षेत्रीय संयोजक मुरारी खरेलले जेठ २१ गते घोराहीमा मानव अधिकारको अवस्था र प्रमुख मानव अधिकार सवाल विषयक अन्तरक्रिया कार्यक्रममा बोल्दै कार्ययोजनाको कार्यान्वयनकालागि गम्भीर हुन प्रमुख जिल्ला अधिकारी तथा प्रहरी प्रमुखको ध्यानाकर्षण गराएका हुन् ।

तीन वर्षबितिसक्दा पनि जिल्लामा मानव अधिकार राष्ट्रिय कार्ययोजना कार्यान्वयनको खासै उल्लेख्य प्रगति नदेखिएको भन्दै क्षेत्रीय संयोजक खरेलले पञ्चवर्षीय कार्ययोजनालाई सफल बनाई नागरिकलाई मानव अधिकारको प्रत्याभूति गराउन सुझाव समेत दिए ।

'पञ्चवर्षीय कार्ययोजनाको तीन वर्षबितिसक्यो जिल्लामा खासै कार्यान्वयन हुन नसकेको पाइयो ।'- संयोजक खरेलले भने-'मानव अधिकार राष्ट्रिय कार्ययोजनालाई गम्भीर रूपमा लिनुहोस र यसको अक्षरशः पालना गर्नुहोस ।'

दाङका प्रमुख जिल्ला अधिकारी मेघनाथ काफ्लेले मानव अधिकार राष्ट्रिय कार्ययोजना कार्यान्वयनको चरणमै रहेको जानकारी दिँदै आफूहरू कार्ययोजना कार्यान्वयनकालागि गम्भीर रहेको बताए ।

उनले कार्ययोजना कार्यान्वयनकै लागि जिल्लास्थित सबै सरकारी कार्यालयमा मानव अधिकार डेस्कको स्थापना गरिएको र एकजनालाई फोकलपर्सन तोकेर सेवा प्रवाह भइरहेको जानकारी दिए । तर, उनले नागरिकको गुनासो नआएका कारण विषयगत छलफल गर्ने काम भने नभएको बताए । जिल्ला प्रहरी कार्यालयका एसपी धिरजप्रताप सिंहले प्रहरी मानव अधिकारप्रति गम्भीर रहेको र त्यसको कार्यान्वयनमा जिम्मेवार रहेको बताए ।

सो अवसरमा बोल्दै नागरिक समाज, अधिकारकर्मी एवम् पत्रकारहरूले जिल्लामा मानव अधिकारको अवस्थामा सुधार आउन नसकेको र सरकारी कार्यालयहरू नागरिकप्रति जबाफदेही हुन नसकेको गुनासो गरेका थिए ।

जे.एन.सागर