समाचारहरू

राष्ट्रिय मानव अधिकार आयोगले ०७६ जेठ २ गते चौतारामा विकास र मानव अधिकार विषय अन्तरक्रिया कार्यक्रम सम्पन्न गरेको छ ।

जिल्लामा रहेका विभिन्न सरोकारवाला निकायहरूको बीचमा भएको अन्तरक्रिया कार्यक्रममा आयोगका सदस्य सुदिप पाठकले नागरिकहरूको सम्बृद्धि र सुखी नेपाली बनाउनको लागि विकास आवश्यक रहेकाले विकासका पुर्वाधारहरू सुरू गर्दा मानवमैत्री बन्नुपर्ने धारणा राखेका थिए ।

कार्यक्रममा इन्सेक जिल्ला प्रतिनिधि नातिबावु धितालले कानुनी राज्य नै मानव अधिकारमैत्री भएकाले विभिन्न स्वास्थ्य संस्थाहरूमा तोकिएको औषधिको अभाव, वैदेशिक रोजगारीमा गएका नेपालीहरूको अधिकारको सवाल, विकासको नाममा भएका विनाश र महिला तथा बाल हिंसाका घटनामा भएको बृद्धिले मानव अधिकार अवस्था जोखिममा परेको धारणा राखेका थिए ।

प्रमुख जिल्ला अधिकारी गोमादेवी चेम्जोङले जिल्लाको सबै विकासका योजनाहरू मानव अधिकारमैत्री बनाउन पहल सुरू गर्ने प्रतिबद्धता व्यक्त गरिन् ।

विभिन्न सरोकारवाला तथा कार्यालयका प्रमुखहरूले आफूले देखेका र भोगेका कुराहरू राष्ट्रिय मानव अधिकार आयोगलाई सुझावको रूपमा राखेका थिए ।

नातिबावु धिताल