समाचारहरू

राष्ट्रिय मानव अधिकार आयोगको आयोजनामा, जिल्ला प्रशासन कार्यालय र इन्सेककाे समन्वयमा मानव अधिकारसम्बन्धी पाँचौँ राष्ट्रिय कार्ययोजना कार्यान्वयन विषयक अन्तर्क्रिया कार्यक्रम ०८० कात्तिक १ गते  सम्पन्न गरेको छ ।

राष्ट्रिय मानव अधिकार आयोगका निमित्त प्रमुख रेवा रेग्मी र मानव अधिकार अधिकृत लक्ष्मी पौडेलले विश्वव्यापी आवधिक समिक्षा, मानव अधिकार कार्ययोजना कार्यन्वयन बारे प्रस्तुति गर्नु भयो ।

प्रमुख जिल्ला अधिकारी चन्द्र अधिकारीले जिल्लामा पाँचौँ मानव अधिकारसम्बन्धी राष्ट्रिय कार्ययाेजना कार्यन्वयन जिल्ला समन्वय समिति गठन भएकोले तत्काल बैठक बसेर छलफल गर्ने बताउनु भयो । जिल्ला अस्पतालका डा. अमित कुमार शाहले मातृ मृत्यु दर घटे पनि अझै शिशु मृत्यु दर न्यूनीकरण गर्न सबै जना लाग्नु पर्ने बताउनु भयो ।

उक्त कार्यक्रममा बोल्दै महिला अधिकारकर्मी सुनिता गुरुङले कामका लागि बालबालिका तथा युवाहरू बाहिर जोखिमयुक्त काममा पुगेको र ९ देखि १२ कक्षामा विद्यालय छाड्ने बढेको बताउनु भयो ।

यस कार्यक्रमका प्रमुख अतिथि तथा जिल्ला समन्वय समितिका उपप्रमुख विजय लामाले रसुवामा द्वन्द्वकालमा धेरै मानव अधिकार उलङ्घन भएको बताउनु भयो । उहाँले हाल त्यस्ता घटना कम भएको तर गाउँगाउँमा केही आपराधिक घटन हुने गरेको र बालबालिकालाई मानव अधिकार शिक्षा आवश्यक रहेकोमा उल्लेख गर्नुभयो ।

शिक्षा समन्वय इकाईका प्रमुख रमाकान्त अर्यालले ९ देखि १० कक्षामा पढ्ने बालबालिकाहरूकाे विद्यालय छाड्ने दर घट्न नसकेको कारणमा श्रमका लागि बाहिर जाने र बाल विवाह भएको बताउनु भयो ।

इन्सेकका जिल्ला प्रतिनिधि हेमनाथ खतिवडाले कार्यक्रमको उद्देश्य र सहजीकरण गर्दै कार्यक्रमबाट महिला शसक्तिकरण र स्थानीय सरकारलाई जिम्मेवार बनाउन र मानव अधिकार मैत्री शासन व्यवस्था प्रणालीलाई अवलम्बन गर्नको लागि सबैमा जागरुक हुन जरुरी रहेको बताउनु भयो ।

इन्सेक बागमती प्रदेश कार्यालय, हेटौँडा