समाचारहरू

पश्चिमाञ्चल क्षेत्रीय प्रशासक खगराज बरालले मानव अधिकारको संरक्षण र सम्वर्द्धनको लागि राज्यका निकाय प्रतिवद्ध रहेको बताएका छन् । ६८ औँ अन्तर्राष्ट्रिय मानव अधिकार दिवसको सन्दर्भमा मानव अधिकार पश्चिमाञ्चल महाभेला मुल समारोह समिति र राष्ट्रिय मानव अधिकार आयोग क्षेत्रीय कार्यलय पोखराले संयुक्त रूपमा आयोजना गरेको रक्तदान कार्यक्रममा क्षेत्रीय प्रशासक बरालले सो कुरा बताएका हुन् ।

क्षेत्रीय प्रशासक बरालले आयोगका मानव अधिकार अधिकृत ज्योती घिमिरेलाई 'ब्लड ब्याग' हस्तान्तरण गरी कार्यक्रमको उद्घाटन गरेका थिए ।

हरेक वर्ष विभिन्न कार्यक्रमको आयोजना गरी मनाइने मानव अधिकार महाभेलाको लागि यस वर्षको लागि 'हाम्रो आवाज, हाम्रो सहभागिता, विकासमा आधारित हाम्रो समावेशिता' भन्ने मुल नारा रहेको बताइएको छ ।

कार्यक्रममा मानिसको सबैभन्दा ठुलो अधिकार जीवनको अधिकार भएको र मानव जीवन बचाउने रक्तदान कार्यक्रमबाट मानव अधिकार दिवसको उद्घाटन गरिनु महत्वपूर्ण शुरूवात भएको सहभागी वक्ताहरूले बताए ।

रक्तदान कार्यक्रममा २६ युनिट रगत सङ्कलन गरिएको आयोजकले बताएको छ । विगत केही वर्षदेखि राष्ट्रिय मानव अधिकार आयोग, इन्सेक, नागरिक समाज, तथा विभिन्न सङ्घसंस्थाहरूले कार्यक्रमलाई एकीकृत गरी महाभेलाको रूपमा मनाउँदै आएका छन् ।

इन्सेक पश्चिमाञ्चल क्षेत्रीय कार्यलय पोखरा