समाचारहरू

ज्यामरुङ गाविस निवासी दलित सेवा सङ्घका अध्यक्ष ३० वर्षीय श्याम मगरातीलाई धम्की दिएको भन्दै जिल्ला प्रहरी कार्यालयका इन्स्पेक्टर भिमलाल भट्टराईलाई कारबाही गर्न जिल्लामा क्रियाशील मानव अधिकारकर्मीहरूले पुस ११ गते प्रेस विज्ञप्ति प्रकाशन गरी आग्रह गरेका छन् ।

जातीय छुवाछुतको घटनामा पीडितको पक्षमा वकालत गरेको, अजित मिजार ढकालको घटनामा दलित आयोगलगायतले सोधपुछ गरेको जस्ता आरोप लगाउँदै पुस ७ गते र सो पछि पटक पटक फोन गरेर जिल्ला प्रहरी कार्यालयका इन्स्पेक्टर भट्टराइले धम्की दिएको मगरातीले बताए ।

मानव अधिकारको संरक्षण गर्ने दायित्व राज्यको हुने भएकोले मानव अधिकार रक्षकमाथि भएको धम्कीप्रति संवेदनशील हुँदै घटनामा संलग्न प्रहरीलाई कारबाही गर्न विज्ञप्तिमार्फत माग गरिएको छ ।

जिल्लामा क्रियाशील मानव अधिकार संस्था अनौपचारिक क्षेत्र सेवा केन्द्र (इन्सेक), नेपाल दलित मुक्ति मोर्चा, दलित सेवा संघ, नेपाल दलित संघ, नेपाल राष्ट्रिय दलित कल्याण समाज, धादिङ टेलर मजदुर संघ लगायत संघ संस्थाले संयुक्त प्रेस विज्ञप्ति प्रकाशन गरी सो माग गरेका हुन् ।

सिताराम अधिकारी