समाचारहरू

राष्ट्रिय मानव अधिकार आयोगमा परेका उजुरीहरूको यथार्थ अवस्था छानबिन गर्न आयोग र इन्सेककर्मी सम्मिलित टोलीले माघ ६ गते सप्तरीको विभिन्न गाविसमा अवलोकन निरीक्षण गरेको छ ।

आयोगका मानव अधिकार अधिकृतहरू रेवा रेग्मी, चिरञ्जिवी कोइराला, मानव अधिकार सहायक विभा ढुङ्गाना, इन्सेक सप्तरीका प्रतिनिधि मनोहरकुमार पोखरेलसहितको टोलीले प्रभावितहरूको गाउँघरमा पुगी हालको अवस्थाबारे जानकारी लिएका छन् ।

दश वर्ष देखि थन्किएका पुराना उजुरीको छानबिन गर्न राजविराजसहित कञ्चनपुर, बरमझिया, फत्तेपुर पुगेको टोलीले पीडितहरूसँग भेंटघाट गरी वर्तमान अवस्थाका बारेमा जानकारी लिनुका साथै अपेक्षा सङ्कलन गरेको छ । टोलीले गम्हरिया प्रवाहा गाविस-४ पट्टीटोल पुगेर एकै परिवारका पाँच दृष्टिविहीनसहित अन्य अपाङ्गता भएका व्यक्तिहरूको अवस्थाबारे समेत जानकारी लिएको छ ।

टोलीले जिल्ला प्रशासन कार्यालय, महिला तथा बालबालिका कार्यालय, स्थानीय शान्ति समितिको कार्यालय, कानुनी सहायता समितिमा पुगेर भेटघाट गर्नुका साथै पीडित, प्रभावितहरूको उजुरी र कार्यान्वयन अवस्थाबारे जानकारी लिएको छ । टोलीले उक्त कार्यालयहरूलाई पीडित र प्रभावितहरूको उजुरी सम्बोधनका लागि आवश्यक सम्पूर्ण उपाय अपनाउन सुझाव समेत दिएको छ ।

मनोहरकुमार पोखरेल