समाचारहरू

विगत केही दिन देखि भइरहेको अविरल वर्षाले देशका विभिन्न भागमा आएको बाढी, पहिरो तथा डुबानपछि सृजित अवस्थाप्रति राष्ट्रिय मानव अधिकार आयोगले गम्भीर ध्यानाकर्षण भएको जनाएको छ ।

हालसम्म डुबान तथा बाढी पहिरोबाट विभिन्न जिल्लामा ६४ जनाको मृत्यु भएको, ४४ जना घाइते भएका, ३६ जना बेपत्ता भएका,  करिब १९ हजार घरपरिवार विस्थापित भएका, ७ सय २८ घरहरू पूर्णरूपमा क्षति भएका तथा २ हजार १ सय ५३ घरहरूमा आंशिक क्षति भएको गृह मन्त्रालय लगायत विभिन्न श्रोतहरूलाई उद्दृत आयोगले जनाएको छ ।

राष्ट्रिय मानव अधिकार आयोगका अध्यक्ष अनूपराज शर्माको अध्यक्षतामा बसेको बैठकले विपद् व्यवस्थापन र मानवीय सहायतामा खट्ने नेपाल सरकार, सुरक्षा निकाय, राष्ट्रिय तथा अन्तर्राष्ट्रिय संघ संस्थाहरूलाई तत्काल प्रभावकारी कदम चाल्दै प्राकृतिक प्रकोपबाट प्रभावित व्यक्तिको उद्धार र राहतको लागि तत्काल जुट्न विशेष आग्रह गरेको छ ।

प्राकृतिक प्रकोपपछि देखा पर्नसक्ने सरुवा रोगको प्रकोप तथा महामारीबाट संरक्षणका लागि चिकित्सकको अस्थायी टोलीको तत्काल व्यवस्था गर्नुपर्ने, बाढी, पहिरो तथा डुबानबाट थप जनधनको क्षति हुन नदिन, पूर्व सावधानी अपनाउन, जोखिममा परेका सुत्केरी महिला, बालबालिका, जेष्ठ नागरिक तथा असहाय व्यक्तिहरूलाई आवश्यकता अनुसार खोज, उद्धार र राहत कार्यमा अविलम्ब लाग्न आयोग नेपाल सरकार तथा सम्बद्ध सबै सरोकारवालासँग आयोगले आग्रह गरेको छ ।

अनलाइन डेस्क