समाचारहरू

चौरजहारी नपा-१२ मा नेकपा माओवादी केन्द्र र नेपाली काङ्ग्रेसका कार्यकर्ताबिच झडप भएको छ ।

स्थानीय तहको चुनाव प्रचार प्रसारको विषयमा विवाद हुँदा दुई पार्टीका कार्यकर्ताबिच झडप भएको प्रहरी चौकी सर्केनाले जनाएको छ ।

झडपमा काङ्ग्रेसका कार्यकर्ता चौरजहारी नपा-१२ का ४० वर्षीय भीमबहादुर ओली गम्भीर घाइते भएका छन् । उनको टाउकोमा गहिरो चोट लागेको प्रहरीको भनाइ छ ।

पीडित ओलीको उपचार चौरजहारी मिसन अस्पतालमा भइरहेको काङ्ग्रेसका वडा अध्यक्षका उम्मेदवार अविर देवकोटाले जानकारी दिए । उनी आधारभूत विद्यालय जुम्लिपोखरीका प्रद्यानाध्यापकसमेत रहेका छन् ।

झडपमा माओवादी र काङ्ग्रेसका अन्य कार्यकर्ता सामान्य घाइते भएका छन् । झपमा संलग्न भएको भन्दै माओवादी केन्द्रका दुई जना कार्यकर्तालाई गिरफ्तार गरिएको प्रहरी चौकी सर्केनाका इञ्चार्ज पूर्णबहादुर थापाले जानकारी दिए ।

चुनावी प्रचार प्रसारमा खटिएका आफ्ना कार्यकर्तालाई काङ्ग्रेसका कार्यकर्ताले हातपात गरेपछि झडप भएको माओवादीले दावी गरेको छ । चुनावी घरदैलोमा खटिएका माओवादी केन्द्रका कार्यकर्ता दीपा सार्कीलगायतलाई काङ्ग्रेस कार्यकर्ता भीमबहादुर ओलीलगायतका व्यक्तिले हातपात गरी कपडा च्यातिदिएपछि झडप भएको माओवादी केन्द्रका तर्फबाट १२ नम्बर वडाका अध्यक्ष पदका उम्मेदवार टिकाराम ओलीको दावी छ ।

आदर्श केसी