समाचारहरू

मतदातालाई पैसा बाँडेको आरोपमा नेकपा माओवादी केन्द्रका कार्यकर्ताहरूले दाङको राप्ती गाउँपालिकाका नयाँ शक्ति पार्टी नेपालबाट अध्यक्ष पदका उम्मेदवार ५३ वर्षीय नन्दकुमार चौधरी र सो पार्टीका राप्ती गाउँपालिका संयोजक ४६ वर्षीय होमप्रसाद शर्मालाई कुटपिट गरेको पीडितले आरोप लगाएका छन् ।

जेठ २२ गते चुनावी घरदैलो सकेर घर फर्कने क्रममा बिरामी मामा भगत चौधरीलाई भेट्न राप्ती गाउँपालिका-२ कटाहा गाउँ पुगेका चौधरी र शर्मालाई माओवादी केन्द्र राप्ती गाउपालिकाका संयोजक धर्मराज अधिकारी र वाइसिएल इञ्चार्ज दीपक पुनको नेतृत्वमा आएको एक समूहले लात्ती र मुक्का प्रहार गरी कुटपिट गरेको नयाँ शक्ति पार्टी नेपाल दाङले जेठ २३ गते घोराहीमा पत्रकार सम्मेलनको आयोजना गरेर जानकारी दिएको छ ।

आधा घण्टासम्म नियन्त्रणमा लिएर कुटपिट गरेको र प्रहरी आएपछि आफूहरूलाई उद्धार गरेको पीडित शर्माले बताए । 'हामी पैसा बाँड्न गएका होइनौँ । मेरा मामा भगत चौधरीको उपचारकालागि भाइ रामशङ्कर चौधरीलाई एकहजार दिएको हुँ ।'-गाउँपालिका अध्यक्ष पदका उम्मेदवार चौधरीले भने-'तर, माओवादी केन्द्रका कार्यकर्ताहरूले हाम्रो चरित्र हत्या गर्ने हिसावले पैसा बाँडेको भन्दै कुटपिट समेत गरे । हामीलाई मार्ने हिसावले उनीहरू आक्रमणमा उत्रिएकाले अबिलम्ब कारबाही होस ।'

यसैबिच नयाँ शक्ति नेपाल दाङले पार्टीले राप्ती गाउँपालिकाका अध्यक्ष पदका उम्मेदवार तथा नेतामाथि आक्रमण गर्नेलाई कारबाहीको माग गरेको छ । पार्टीका जिल्ला संयोजक नारायण भट्टराई र सङ्घीय समाजवादी फोरमका जिल्ला इञ्चार्ज अशोक यादवले संयुक्त विज्ञप्ति जारी गरी घटनाका दोषीहरूलाई तत्काल कारबाहीको माग गरेका छन् ।

नेकपा माओवादी केन्द्रका पोलिटव्यूरो सदस्य निर्मल आचार्यले उम्मेदवारमाथि हातपात हुनु गलत काम भएपनि पैसा बाँड्न थालेपछि माओवादी केन्द्रका कार्यकर्ताहरूले विरोध गरेको बताए ।

जे.एन.सागर