समाचारहरू

मालारानी गाउँपालिका-८ का २७ वर्षीय कृष्ण पाण्डेलाई माओवादी केन्द्रका कार्यकर्ताले सामूहिक आक्रमण गरी घाइते बनाएको आरोपमा पीडितले जेठ १६ गते प्रहरीमा उजुरी दिएका छन् ।

नेकपा एमालेका कार्यकर्ता पाण्डेले आफूलाई सोही ठाउँका २५ वर्षीय धार्मिक अर्याल, २६ वर्षीय श्याम थापा र २५ वर्षीय निराजन अर्यालको समूहले जेठ १५ गते दिउँसो आक्रमण गरेको उजुरीमा उल्लेख गरेका छन् ।

पीडित पाण्डे आफ्नो घरबाट सन्धिखर्कतर्फ आउँदै गर्दा मालारानी-८ स्थित बामरुकमा स्थानीय तहको निर्वाचनको विषय र एमालेको राजनीति गरेको विषयलाई लिएर माओवादी केन्द्रका कार्यकर्ताले निर्घात कुटपिट गरेको एमालेका जिल्ला सचिव रामबहादुर चौहानले जानकारी दिए ।

सामान्य विवाद भएपछि माओवादी केन्द्रका कार्यकर्ताबाट हातपात भएको भन्ने बुझिएको माओवादी केन्द्रका जिल्ला संयोजक ठाकुरकुमार विकले बताए ।

पीडित पाण्डे अनेरास्ववियुका जिल्ला स्तरका नेता हुन् । उनी जिल्लाका स्थानीय मिडिया र बुटवलको लुम्बिनी टेलिभिजनमा समेत कार्यरत छन् ।

घटनाको विरोधमा नेपाल पत्रकार महासङ्घ र प्रेस चौतारीले जेठ १५ गते विज्ञप्ति जारी गरी घटनाको विरोध गर्दै घटनामा संलग्नलाई कानुनी कारबाहीको माग गरेका छन् ।

आक्रमणमा संलग्न व्यक्तिहरूलाई प्रहरीले तत्काल गिरफ्तार गरेपनि उनीहरूलाई छोडिदिएको एमाले पक्षको आरोप छ ।

जिल्ला प्रहरी कार्यलयका डिएसपी एकनारायण कोइरालाले भने घटनाका संलग्न आरोपितहरू फरार रहेको र खोजतलासका लागि प्रहरी परिचालन गरिएको जानकारी दिएका छन् ।

नाक, र टाउकोमा चोट लागेका पाण्डेको अर्घाखाँची जिल्ला अस्पतालमा उपचार हुन नसकेपछि थप उपचारका लागि भैरहवा पठाइएको छ ।

नारायण भुसाल