समाचारहरू

धनकुटाको कुरूलेतेनुपा घर भइ इटहरी उमनपा-५ बस्दै आएका २८ वर्षीय पत्रकार जीवन फुयाललाई नेत्रविक्रम चन्द विप्लव नेतृत्वको नेकपा माओवादीका कार्यकर्ताले सुराकीको आरोप लगाउँदै भदौ १० गते राति कुटपिट गरेको भन्दै न्यायको मागसहित इलाका प्रहरी कार्यालय इटहरीमा भदौ ११ गते उजुरी दिएका छन् ।

इटहरी उमनपा-४ हलगडाको एक होटलमा खानखान पुगेका पत्रकार फुयाललाई राति साढे ८ बजे उक्त पार्टीका कार्यकर्ता दिपक विष्टसहित तीन जनाको समूहले सुराकीको आरोप लगाउँदै र एनसेलको टावरमा गरेको आक्रमणको समाचार नबनाएको भन्दै कुटपिट गरेको पीडितले बताए ।

'म कहिलेकाँही त्यो होटलमा खाना खान्थें । हिजो पनि खाना खान गएका बेला तीनजनाको समूहले सोधपुछ गर्‍यो । मैले आफ्नो परिचय दिएँ । त्यसपछि उनीहरूले मलाई बाहिर बोलाएर सुराकी भन्दै कुटपिट गरे । मसँग भएको क्यामेरा पनि फुटाइदिए ।'-उनले भने ।

विप्लव समूहका इटहरी इञ्चार्ज रामप्रसाद राईले भने पार्टीको निर्देशनमा कुटपिट नभएको बताए । कुटपिटमा संलग्न दिपकलाई पार्टीले सङ्खुवासभामा जिम्मेवारी तोकिदिए पनि इटहरीमा डेरा लिएर बस्दै आएकोसमेत राईले बताए ।

इटहरीबाट समय आवाज नामक पत्रिका प्रकाशन गर्दै आएका जीवनले घटनामा संलग्नलाई कारबाहिको माग गरेका छन् ।

जीवनको स्वास्थ्य उपचार प्राथमिक स्वास्थ्य केन्द्र इटहरीमा गरिएको छ । घटनालाई गम्भीर रूपमा लिँदै आरोपितहरूको खोजी गरिरहेको इलाका प्रहरी कार्यालय इहटरीका डिएसपी नरेशराज सुवेदीले बताए ।

शेखर ढकाल