समाचारहरू

लाखौँ रकम खर्चेर तीन वर्षअघि बैतडीको सदरमुकाम गडीमा निर्माण भएको महिला सुरक्षा आवास गृह प्रयोगमा आउन नसक्दा हिंसा पीडित महिला समस्यामा परेका छन् । यसका साथै उक्त भवन पनि जीर्ण बन्दै गएको छ । हिंसामा परेका बेवारिसे महिलालाई सेवा दिन निर्माण भएको सुरक्षागृह आफैँ बेवारिसे अवस्थामा पुगेको छ ।

हिंसामा परेका महिला न्यायको लागि ग्रामीण भेगबाट सदमुकाममा आँउदा उनीहरूको आवासको लागि बनाइएको सेफ हाउस प्रयोगमा नआउँदा समस्या भएको हो । सदरमुकाम आउने पीडित महिलाले अहिले सेवा पाउन सकेका छैनन् । ग्रामीण क्षेत्रबाट हिंसामा परेका महिलाले कानुनी उपचारको लागि सदरमुकाम आउँदा समस्या खेप्नुपरेको छ ।

अन्तरपार्टी महिला सञ्जालले नगरपालिका, जिविस, केयर नेपालको समुदाय सहयोग कार्यक्रम अन्तर्गत २४ लाख रुपियाँ लगानीमा सो पाँच कोठे महिला सुरक्षा गृह भवन निर्माण गरिएको थियो । तर, आर्थिक समस्या र सरोकारवाला निकायको बेवास्ताका कारण महिला सुरक्षा गृह सञ्चालन गर्न नसकिएको महिला अधिकारकर्मी सरस्वती नेपालीले बताइन् ।

प्रयोगमा नआउँदै जीर्ण बन्न थालेको सुरक्षागृह सञ्चालनका लागि सरोकारवाला निकायसँग सहकार्य गरी पहल गर्ने अखिल नेपाल महिला सङ्घकी केन्द्रीय सचिवालय सदस्य माया भट्टले बताइन् ।

गत असोजमा विशालपुरकी बेसाहारा सुत्केरी किशोरीलाई जिल्लामा आश्रय दिन नसक्दा कञ्चनपुरको महेन्द्रनगरको सुरक्षा गृहमा पठाइएको थियो । आफ्नै जिल्लामा सुरक्षा गृह हुँदासमेत पीडित महिलाहरूले आश्रय लिन अन्य जिल्लामा जानु परेको स्थानीयको गुनासो रहेको छ ।

नरी बडु