समाचारहरू

राजविराज नपा-७ की २२ वर्षीया रश्मी खडगीको उजुरीका आधारमा उनका २७ वर्षीय पति सागर खडगीलाई सप्तरी प्रहरीले वैशाख ६ गते गिरफ्तार गरेको छ ।

राष्ट्रिय महिला आयोगको अनुरोधमा घरबाटै गिरफ्तार भएका खडगीलाई काठमाडौँस्थित आयोगको कार्यालयमा उपस्थित गराउन वैशाख ७ गते राजविराजबाट आरोपितलाई प्रहरीमार्फत काठमाडौँ पठाइएको जिल्ला प्रहरी कार्यालयका एसपी मुकेशकुमार सिंहले बताए ।

सामाजिक परम्पराअनुसार २०७३ सालमा विवाहित पीडित र आरोपितबिच घरायसी झगडा भएपछि पीडित काठमाडौँ मनपा-१९ स्थित माइतीघरमा बस्दै आएकी छिन् । पीडितले आरोपितपतिबाट दाइजो मागी मानसिक तनाव पाएको र विवाह दर्ता नबनाई दिएको आरोप लगाएकी छिन् ।

पीडितले आरोपितविरूद्ध आयोगको कार्यालयमा दिएको उजुरीका आधारमा आयोगले छलफलका लागि बारम्बार बोलाउँदा पनि आरोपित सम्पर्क गर्न नगएपछि उनलाई आयोगमा उपस्थित गराउन प्रहरी प्रधान कार्यालयलाई ०७४ पुस ३० गते नै पत्राचार गरेको थियो ।

मनोहरकुमार पोखरेल