समाचारहरू

खाँडादेवी गाउँपालिका–३ भिरपानी सित्खामा ५५ वर्षीया बिबा माझीको हत्या गरेको आरोपमा ११ जनाविरुद्ध ०७९ असोज ११ गते पीडितका आफन्तले जिल्ला प्रहरी कार्यालयमा उजुरी दर्ता गराएका छन् ।

पीडित महिलालाई असोज ९ गते चामलको हानी, कुटपिट समेत गरेर हत्या गरेको आरोपमा प्रहरीले ११ जनालाई नै गिरफ्तार गरी अनुसन्धान सुरु गरेको जिल्ला प्रहरी कार्यालयका प्रमुख डिएसपी राजकुमार थिङले बताउनु भयो ।

हत्याको घटनामा संलग्न भएको आरोपमा खाँडादेवी गाउँपालिका–३ भिरपानी सित्खाका ३७ वर्षीय शिवबहादुर माझी, ४० वर्षीया राधिका माझी, १७ वर्षीया सपना माझी, १९ वर्षीय भरत माझी, २० वर्षीय सुरज माझी, १६ वर्षीया सविना माझी, १९ वर्षीया मनीषा माझी, १६ वर्षीय बालक,  २६ वर्षीय धनबहादुर माझी र १९ वर्षीय राजेश माझी विरुद्ध ०७९ असोज ११ गते  कर्तव्य ज्यानको मुद्दा दर्ता भएको जिल्ला प्रहरी कार्यालयले जनाएको हो ।

पीडितका आफन्त पदमलाल माझीले दिएको किटानी जाहेरीको आधारमा गिरफ्तार गरी हिरासतमा राखेर अनुसन्धान सुरु गरेको डीएसपी थिङले जानकारी दिनुभयो ।

माझी समुदायले पितृले अराएको भन्दै ५५ वर्षीय बिबा माझीलाई चामलको छर्राले हान्ने, लछारपछार गर्ने, थिच्नुका साथै कुटपिट गरेर हत्या गरेको पीडितका आफन्तको आरोप छ ।

सोह्र श्राद्धको समयमा ०७९ असोज ५ गतेबाट सुरु भएको माझी समुदायको पितृ कार्य श्राद्ध असोज ७ गते सकिएको भए पनि असोज ९ गतेसम्म केही युवा युवती काम्न नछाडेपछि बिबा र उहाँकी आमा ७० वर्षीया सुनमाया माझी बोक्सी भएको कारण पितृले नछाडेको भदै स्थानीय माझी समुदायले उहाँहरूको घरमा गएर चामलको छर्रा हान्ने र लछारपछार गर्ने गरेका थिए ।

गाउँलेहरूको आक्रमणबाट बिबाको घटनास्थलमा नै ज्यान गएको थियो भने सुनमया गम्भीर घाइते हुनुभएको छ । उहाँको मन्थली अस्पतालमा उपचार भइरहेको छ ।

बिबाको शवको सूक्ष्म परीक्षणको लागि असोज ११ गते मेडिकल शिक्षण अस्पताल दुवाकोट पठाएको छ ।

घटनामा संलग्न भएको आशंकामा २३ जनालाई प्रहरी नियन्त्रणमा लिई सोधपुछ गरेको थिाये । ती मध्ये ११ जना विरुद्ध किटानी जाहेरी दर्ता भएकोले हिरासतमा राखी अनुसन्धान सुरु भएको डिएसपी थिङले बाउनुभयो । अन्य १२ जनालाई भने प्रहरीले सादा तारेखमा छाडेको छ ।

नवराज घिमिरे