समाचारहरू

महाकुलुङ गाउँपालिका-२ बुङस्थित पेल्माङ आधारभुत विद्यालयमा अध्ययनरत २ सय भन्दा बढी बालबालिका अचानक एकैसाथ बिरामी भएपछि महाकुलुङ गाउँपालिकाबासी त्रसित बनेका छन् ।

माघ १ गते एक/दुई जनालाई सामान्य रूघाखोकीको लक्षण देखिएपनि माघ २ गतेसम्ममा २ सय भन्दा बढी बालबालिका प्रभावित भएपछि अभिभावकहरू त्रसित बनेका हुन् ।

प्राथमिक स्वास्थ्य केन्द्र सोताङबाट खटिएको स्वास्थ्यकर्मीको टोलीले स्वइन फ्लु हुन सक्ने आशङ्का गरेको छ ।

बालबालिकाहरूमा उच्च ज्वरो आउने, छाति पोल्ने, बान्ता हुने, टाउको दुख्ने, जस्ता लक्षण देखिएको हुनाले स्वइन फ्लु हुन सक्ने टोलीमा खटिएका डाक्टर सण्डु शेर्पाले बताए ।

बिरामीहरूलाई औषधि उपचार गर्दा स्वास्थ्य अवस्थामा खासै सुधार नभएपछि समस्या बढ्दै गएको डा. शेर्पाले बताए ।

अहिले बिरामीहरूको उपचारका लागि डा. शेर्पाको नेतृत्वमा ल्याब असिष्टेण्ट भक्ति फडेरा, अनमी दीपा शेर्पा, पशी शेर्पा, कार्यालय सहयोगी कमल बस्नेत र बुङ स्वास्थ्य चौकीबाट अहेब खेमराज बस्नेत, अनमी मनकुमारी राई गरी आठ जनाको टोली खटिरहेको छ ।

बिरामीको अवस्थाको बारेमा इपिडिमियोलोजी तथा रोग नियन्त्रण महाशाखामा जिल्ला स्वास्थ्य कार्यालयमार्फत जानकारी गराइएको भन्दै माघ ५ गतेसम्म स्वास्थ्यकर्मीको टोली आएर स्याम्पल कलेक्शन गर्ने डा. शेर्पाले बताए ।

४ सय २२ जना विद्यार्थी अध्ययनरत सो विद्यालयमा बिरामीको सङ्ख्यामा न्यून होस् भन्ने हेतुले माघ ८ गतेसम्मका लागि विद्यलाय बन्द गराएको प्रधानाध्यापक टङ्कबहादुर दाहालले बताए ।

पासाङ बम्जन तामाङ