महाअभियोग प्रस्तावका पक्षमा मतदान गर्न आग्रह गर्दै सङ्कलित हस्ताक्षर संसदमा पठाइयो

  ०७३ कात्तिक २३ गते

अख्तियार दुरूपयोग अनुसन्धान आयोगका निलम्बित प्रमुख लोकमान सिंह कार्कीविरुद्ध संसदमा पेश गरिएको महाअभियोग प्रस्तावका पक्षमा मतदान गर्न सांसदलाई आग्रह गर्दै कास्कीमा सङ्कलित हस्ताक्षर कात्तिक २३ गते व्यवथापिका संसदमा पठाइएको छ ।

जिल्ला प्रशासन कार्यलय पोखरामा एक कार्यक्रममा शान्तिका लागि नागरिक समाजको सञ्जाल पोखराका अध्यक्ष ढाकाराम पौडेलले सहायक प्रमुख जिल्ला अधिकारी झलकराम सुवेदीलाई सो हस्ताक्षर सहितको ध्यानाकर्षण पत्र बुझाएका हुन् ।

ध्यानाकर्षण पत्रमा सहायक प्रमुख जिल्ला अधिकारी सुवेदीले सङ्कलित हस्ताक्षरलाई आफूले सम्बन्धित निकायसमक्ष पुर्‍याउने प्रतिबद्धता व्यक्त गरे ।

ध्यानाकर्षण पत्रमा कार्कीले संवैधानिक क्षेत्राधिकार उल्लङ्घन गर्नु लोकतान्त्रिक मुल्य र मान्यता विपरित भएकाले महाअभियोग प्रस्तावको समर्थन गर्न र विधिको शासन अनुरुप मुलुकलाई अघि बढाउन सबै सांसदलाई आग्रह गरिएको कुरा उल्लेख गरिएको छ ।


इन्सेक पश्चिमाञ्चल क्षेत्रीय कार्यलय पोखरा