समाचारहरू

जिल्लाको एकमात्र सुविधा सम्पन्न स्वास्थ्य संस्था जिल्ला अस्पताल पर्वत एक वर्षदेखि एम्बुलेन्स सेवा विहीन बनेको छ । अस्पतालमा सञ्चालनमा रहेको एउटा एम्बुलेन्स मर्मत हुन नसक्दा सेवाग्राही मर्कामा परेका छन् ।

६ वर्षअगाडि खरिद गरिएको एम्वुलेन्स बिग्रिएपछि एक वर्षदेखि मर्मतका लागि पोखरामा लगेर छाडिएको अस्पतालले जनाएको छ । पोखरास्थित एक वर्कशपमा राखिएको एम्बुलेन्स मर्मतका लागि ५ लाख रुपियाँ खर्च लाग्ने जनाइएको भएपनि मर्मतका लागि कुनै निकायले रकमको व्यवस्था नगर्दा मर्मत नभएको जिल्ला स्वास्थ्य कार्यालय, पर्वतका जनस्वास्थ्य अधिकृत सजिना महर्जनले जानकारी दिइन् ।

'कुश्मा नगरपालिका, पश्चिमाञ्चल क्षेत्रीय स्वास्थ्य निर्देशनालयमा पटकपटक पत्र पठाएपनि मर्मत रकमको लागि बेवास्ता गरेको छ ।'-महर्जनले भनिन् । उनले मर्मत नभएर एम्बुलेन्स थन्किँदा दैनिक आउने र रिफर गर्नुपर्ने बिरामी मर्कामा परेको बताइन् ।

अस्पतालमा अहिले दैनिक ५० देखि १ सयको हाराहारीमा बिरामी आउने गरेका छन् । बिरामीहरूलाई यहाँ सम्भव नभएमा जिल्ला बाहिर पठाउनुपर्ने अवस्था छ तर एम्बुलेन्स सेवा नहुँदा समस्या भएको छ ।

पोखरा र बागलुङ रिफर गर्नुपर्ने बिरामीहरूलाई भाडाका ट्याक्सीमा पठाउनुपर्ने बाध्यता रहेको महर्जनले बताइन् । जिल्ला अस्पतालमा पर्वत जिल्ला सहित बागलुङका जैमिनी नगरपालिका, बागलुङ नगरपालिकालगायतका बासिन्दाले पनि सेवा लिने गरेका छन् ।

नेपाल रेडक्रस सोसाईटी पर्वत शाखामा रहेको एम्बुलेन्सका चालकको समस्या भोग्दै आएको छ । लामो समयदेखि एम्बुलेन्स चालक विदेशमा गएको र चालक फर्किएपछि मात्रै एम्बुलेन्स सञ्चालनमा आउने रेडक्रसका कार्यालय प्रमुख ख्याम क्षेत्रीले बताए ।

जिल्लामा क्रियाशील पुन युवा क्लबले देउसी भैलो खेलेर सञ्चालनमा ल्याएको एम्बुलेन्सले भने अहिले ग्रामीण क्षेत्रका बिरामीहरूलाई सेवा दिइरहेको छ ।

सन्तोष थापा