समाचारहरू

जिल्ला कारागार, सुर्खेत विगत पाँच वर्षदेखि स्वास्थ्यकर्मी विहिन बनेको छ । मन्त्रालयले खटाएका स्वास्थ्यकर्मी नआएको र दरबन्दीमा काम गरिरहेका कर्मचारी स्थानीय तहमा समायोजन भएर गएपछि कारागार पाँच वर्षदेखि स्वास्थ्यकर्मी विहिन बनेको हो । स्वास्थ्य मन्त्रालय अर्न्तगत चिकित्सा विज्ञान राष्ट्रिय प्रतिष्ठान वीर अस्पतालमा कार्यरत सिनियर अहेब अधिकृत छैटौँस्तरका रामेश्वर चौधरीलाई सुर्खेत कारागारमा खटाइएको थियो । तर उहाँ अहिलेसम्म हाजिर हुन आउनुभएको छैन ।

खटाएका स्वास्थ्यकर्मी हाजिर हुन नआएपछि कारागारमा कैदीबन्दीलाई उपचारको लागि प्रदेश अस्पताल लैजानुपर्ने बाध्यता छ । कारागारमा स्वास्थ्यकर्मी नभएपछि सामान्य रुघाखोकी लागेका र प्रेसरका बिरामीहरूलाई पनि प्रदेश अस्पताल लिनुपर्ने अवस्था रहेको कारागारका सूचना अधिकारी भूवन गौतमले बताउनु भयो । कारागारमा स्वास्थ्यकर्मी नभएको कुरा कारागार व्यवस्था विभाग, स्वास्थ्य सेवा विभाग र गृह मन्त्रालयलाई समेत जानकारी गराइसकेको भए पनि अहिलेसम्म स्वास्थ्यकर्मी हाजिर हुन नआएको कारागार प्रशासनले जनाएको छ । कारागारमा पाँच वर्षदेखि स्वास्थ्यकर्मी नहुनु सरकारको गम्भीर लापरवाही भएको इन्सेक कर्णाली प्रदेश कार्यालयका संयोजक नारायण सुवेदीले बताउनु भयो । ‘कारागारमा भएका कैदीबन्दीको पनि मानव अधिकार हुन्छ । सरकारले व्यवस्था गर्नैपर्ने आधारभूत स्वास्थ्य सेवा समेत कारागारमा नहुनु कैदीबन्दीको स्वास्थ्यको सवाल हो । यो मानव अधिकार विरुद्धको कदम हो’, उहाँले भन्नुभयो ।

लामो समयदेखि कारागारमा स्वास्थ्यकर्मी छैनन् । जसका कारण कैदीबन्दीले समयमै सामान्य स्वास्थ्य उपचार समेत पाउन सकेका छैनन् । कारागारमा रहेका ज्येष्ठ नागरिक र विभिन्न रोगका बिरामीको नियमित प्रेसर चेक गर्नुपर्ने हुन्छ । तर त्यही प्रेसर जाँच गर्ने सुविधा समेत कारागारमा छैन । कारागारमा खटाइएका स्वास्थ्यकर्मी आउन पर्ने माग जिल्ला प्रशासन कार्यालयले पनि गरिरहेको सहायक प्रमुख जिल्ला अधिकारी नारायण पाण्डेयले बताउनु भयो । प्रशासनको पहल र प्रयास जारी रहे पनि अहिलेसम्म खटाएका कर्मचारी किन आएनन् भन्ने विषयमा भने प्रशासन पनि अनविज्ञ रहेको छ । कानुन न्याय तथा मानव अधिकार समितिका पदाधिकारीहरू आएको बेला उक्त विषय उठेको सहायक प्रमुख जिल्ला अधिकारी पाण्डेयले बताउनु भयो । ‘हामीले पनि कुरा राखेका थियौँ । प्रशासन र कारागार प्रशासनबाट पनि माथिल्लो निकायलाई खबर गरेका छौँ । अहिलेसम्म स्वास्थ्यकर्मी आउनुभएको छैन । यसबारेमा हामीलाई पनि थाहा भएन’, उहाँले भन्नुभयो ।

जिल्ला कारागारमा ४ सय जना पुरुष र ४० जना महिला कैदीबन्दी रहेका छन् । १ सय जनाको क्षमता रहेको कारागारमा ४ सय बढी कैदीबन्दी छन् ।

जगतदल जनाला विक