मनोसामाजिक समस्या र न्यूनीकरणका उपायसम्बन्धी अभिमुखिकरण कार्यक्रम सम्पन्न 

  ०७९ जेठ १८ गते 

अनौपचारिक क्षेत्र सेवा केन्द्र (इन्सेक), आमा मिलन केन्द्र र सामाजिक विकास कार्यलयको आयोजनामा मनोसामाजिक समस्या र न्यूनीकरणका उपाय तथा साइबर अपराध यसको असर र कानुनी प्रावधानसम्बन्धी अभिमुखिकरण कार्यक्रम जेठ १७ गते जनप्रिय माध्यमिक विद्यालयमा सम्पन्न गरिएको छ ।

कार्यक्रममा जिल्ला प्रहरी कार्यलय कास्कीका डिएसपी सुन्दर तिवारीले सामाजिक सञ्जालबाट बढ्दो अपराध र त्यसबाट उत्पन्न हुने मानसिक समस्याका विषयमा सहजीकरण गर्नुभएको थियो ।

उहाँले विभिन्न उपहार, चिठ्ठाका प्रलोभन देखाई फेसबुक, ह्वाट्स एप, भाइबरबाट ठगी गर्ने गरेको उल्लेख गर्दै त्यस्ता प्रलोभनमा नपर्न विद्यार्थीहरुलाई आग्रह गर्नु भयो ।

सामाजिक बवकास कार्यलयका बालकृष्ण सुवेदीले सामाजिक सञ्जाल चलाउँदा निकै सचेत हुनुपर्ने बताउनु भयो ।

उहाँले पछिल्लो समय किशोर किशोरीहरूमा मनोसामाजिक समस्या बढ्दो क्रममा देखिएकाले त्यसको न्यूनीकरणका लागि सामाजिक विकास कार्यलयले कार्यक्रमको आयोजना गरिएको जानकारी दिनु भयो ।

जनप्रिय माध्यमिक विद्यालयका प्रधानाध्यापक देवीप्रसाद बस्ताकोटीले देशको भविष्य विद्यार्थीहरूलाई वर्तमान अवस्थामा निकै महत्त्वपूर्ण मानिने मनोसामाजिक विषयलाई बुझाउने प्रयास गरिएको बताउनु भयो ।

उहाँले आगामी दिनमा विद्यालय र सामाजिक संस्थासग सहकार्य गरेर मानव अधिकारका विषयमा कार्यक्रम सञ्चालन गर्ने बताउनु भयो ।

आमा मिलन केन्द्रकी अध्यक्ष इन्दिरा पौडेलले हिंसाबाट हुने मनोसामाजिक असरलाई कम गर्न र बच्नका लागि के कसरी लाग्न सकिन्छ भन्ने बारेमा किशोरकिशोरीलाई सचेतना कार्यक्रम देशव्यापी सञ्चालन गर्न आवश्यक रहेको बताउनु भयो ।

कोशिस नेपालका विनय पाण्डेले मनोसामाजिक समस्याबारे नागरिक स्तरमा चासो नहुँदा स्वास्थ्यमा गम्भीर असर पुगिरहेको बताउनु भयो ।

इन्सेक गण्डकी प्रदेश संयोजक शिवप्रसाद खकुरेलले हिंसाबाट बच्न  र हिंसा हुन नदिनका लागि किशोरकिशोरीहरू सचेत बन्नु पर्ने बताउनु भयो ।

photo20220601kaski


सुशन घिमिरे