समाचारहरू

स्थानीय तह उपनिर्वाचन ०८१ अन्तर्गत देशभरको ४१ ओटा स्थानीय तह मध्ये मधेस प्रदेशको सप्तरीको डाक्नेश्वरी नगरपालिका–१ र ४, धनुषाको धनुषाधाम नगरपालिका–१, महोत्तरीको रामगोपालपुर नगरपालिका–२ र रौतहटको इशनाथ नगरपालिका–७, राजपुर नगरपालिका–६ र गढिमाई नगरपालिका–८ मा रिक्त वडाध्यक्ष पदको लागि ०८१ मङ्सिर १६ गते शान्तिपूर्ण रूपमा मतदान सुरु भएको छ ।

इन्सेक सप्तरी जिल्ला सहजकर्ता अजय परियारका अनुसार डाक्नेश्वरी नगरपालिका–१ को वडाध्यक्ष पदको लागि निर्वाचन सुरू भएको छ । उक्त निर्वाचनलाई शान्तिपूर्ण रुपमा सम्पन्न गर्नका निम्ति डाक्नेश्वरी नगरपालिकास्थित श्री माध्यमिक विद्यालय कबिलासा र श्री राष्ट्रिय प्राथमिक विद्यालय बलाटी गरी दुई ओटा विद्यालयमा मतदान केन्द्र रहेको छ । त्यसैगरी, डाक्नेश्वरी नगरपालिका वडा नं ४ मा रिक्त वडाध्यक्ष पदका लागि भइरहेको उपनिर्वाचनमा पुरुष ७ सय १ जना र महिला ६ सय १८ जना गरी १ हजार ३ सय १९ जनाले मतदाताहरू रहेका छन् ।

इन्सेक धनुषा जिल्ला प्रतिनिधि सन्तोषकुमार यादवका अनुसार धनुषाधाम नगरपालिका–१ मा रिक्त वडाध्यक्ष पदका लागि निवाचन सुरू भएको छ । धनुषाधाम नगरपालिका–१ मा रिक्त रहेको वडाध्यक्ष पदका लागि विभिन्न पार्टीका २० जनाले मनोनयनपत्र दर्ता गराएका थिए । जसमध्ये नेकपा एकीकृत समाजवादीका उम्मेदवार गोपी शाह सुँडीले नेकपा माओवादीका वडा अध्यक्षका उम्मेदवार सुनिल कुमार केबटलाई समर्थन गरेका थिए ।

निर्वाचनलाई शान्तिपूर्ण र व्यवस्थित ढङ्गमा सम्पन्न गर्नका लागि धनुषाधाम नगरपालिका–१ स्थित ठाकुरप्रसाद स्मृति प्रतिष्ठान समदायिक भवन गोविन्दपुर, गाविस भवन धनुषा गोविन्दपुर र श्री माध्यमिक विद्यालय मुंगराहा गरी तीन ओटा मतदान केन्द्रहरूमा मतदान सुरु भएको छ ।

ठाकुरप्रसाद स्मृति प्रतिष्ठान समुदायिक भवन गोविन्दपुरमा १ हजार ६ सय ७२ जना मतदाताहरू रहेका छन् । बिहान सात बजेर १० मिनेटमा सुरु भएको निर्वाचनस्थलमा चार पुरुष र एक महिला गरी पाँच जना कर्मचारीहरू रहेका छन् भने नौ पुरुष र दुई महिला प्रहरी गरी ११ जना प्रहरीहरू खटिएका छन् ।

त्यसैगरी, गाविस भवन धनुषा गोविन्दपुरमा ३ सय ३५ जना मतदाताहरूले मत खसाल्ने छन् । उक्त मतदानस्थलमा पाँच जना पुरुष कर्मचारीहरू खटिएका छन् भने १२ जना पुरुष र दुई जना महिला सुरक्षाकर्मीहरू रहेका छन् निर्वाचन अधिकृत सुनिल कुमार चौहानले जानकारी दिनुभयो ।

श्री माध्यमिक विद्यालय मुंगराहा मतदान केन्द्रमा जम्मा मतदाताको सङ्ख्या ८ सय ७८ रहेको छ । सशस्त्र प्रहरीबाट ३० जना पुरुष, नेपाल प्रहरीबाट १४ जना पुरुष र दुईजना महिला सुरक्षाकर्मीहरू मतदानस्थलमा सुरक्षा दिइरहेका छन् । साथै, मतदानस्थलमा पाँच जना कर्मचारीहरू मध्ये चार जना पुरुष र एकजना महिला रहेको निर्वाचन अधिकृत डम्बर प्रसाद घिमिरेले जानकारी दिनुभयो ।

इन्सेक महोत्तरी जिल्ला प्रतिनिधि ममता विश्वर्माका अनुसार रामगोपालपुर नगरपालिका–२ मा रिक्त रहेको वडा अध्यक्ष पदको लागि मङ्सिर १६ गते भइरहेको उपनिर्वाचनमा १८ जनाले उम्मेदवारी दिएका थिए । रामगोपालपुर नगरपालिका–२ मा जम्मा मतदात संख्या २ हजार १४ सय १ रहेको छ । जसमध्ये पुरुष १ हजार २ सय १ र महिला ९ सय ४० रहेको छ मुख्य निर्वाचन अधिकृत कोइरालाले जानकारी दिनुभयो ।

इन्सेक रौतहट जिल्ला प्रतिनिधि गौरी न्यौपानेका अनुसार इशनाथ नगरपालिका–७, राजपुर नगरपालिका–६ र गढिमाई नगरपालिका–८ को वडाध्यक्ष पदको लागि बिहान सात बजेदेखि सुरु भएको निर्वाचन स्थलको वातावरण शान्त रहेको छ । गढिमाई नगरपालिका–८ मा २ हजार ७ सय ५१ जना मतदाताहरू रेहेका छन् । राजपुर नगरपालिका–६ मा २ हजार ५ सय ४६ र इशनाथ नगरपालिका–७ मा २ हजार ७ सय ७ जना मतदातहरू रहेका छन् ।

इन्सेक मधेस प्रदेश कार्यालय, जनकपुरधाम