मधेस प्रदेशकै पहिलो बालविवाह मुक्त नगरपालिका घोषणा

  ०७९ मङ्सिर १५ गते

सुरुङ्गा नगरपालिका मधेस प्रदेश र सप्तरी जिल्लाकै पहिलो बालविवाह मुक्त नगरपालिका घोषणा गरिएको छ । प्रतिनिधि सभाका नवनिर्वाचित सदस्य एवम् पूर्व मन्त्री तेजुलाल चौधरीले मङ्सिर १४ गते घोषणा पत्र प्रस्तुत गर्दै सुरुङ्गा नगरपालिकालाई बालविवाह मुक्त नगर घोषणा गर्नु भएको हो ।

मधेस प्रदेशसमा बालविवाहविरुद्धको अभियान प्रभावकारी हुन नसकेको परिप्रेक्ष्यमा सुरुङ्गा नगरपालिकाको सबै वडाले बालविवाह मुक्त वडा घोषणाको सूचक पुरा गरेकाले बालविवाह मुक्त नगर घोषणा गरिएको नगरपालिकाले जनाएको छ ।

मधेस प्रदेशकै पहिलो बालविवाह मुक्त नगरपालिका घोषणा गर्न स्थानीय तहमा बालअधिकार समिति गठनसम्बन्धी कार्यविधि, बालविवाह अन्त्यसम्बन्धी रणनीति, बाल संरक्षण नीति र पालिका बालअधिकार संरक्षण समिति तथा विद्यालय र वडास्तरमा बालअधिकार समिति क्रियाशील रहेको थियो ।

घोषणा कार्यक्रममा प्रमुख प्रशासकीय अधिकृत गजेन्द्रनाथ शर्माले बालविवाह मुक्त नगरपालिका घोषणाको प्रतिवेदन प्रस्तुत गर्नु भयो । प्रस्तुत गरिएको प्रतिवेदनमा नगरको ११ वटै वडामा बालविवाह मुक्त वडा घोषणा गर्ने १४ वटा सूचकहरू पूरा गरेपछि घोषणा गरिएको अधिकृत शर्माले बताउनु भयो ।

प्रतिवेदन अनुसार वि.स. २०७८ मङ्सिरदेखि २०७९ कात्तिकसम्म वडा नम्बर १ देखि ११ सम्ममा जम्मा ३ सय ३५ विवाह भएको थियो । जसमा १८ वर्ष मुनीको १ ओटा विवाह तथा २० वर्ष मुनीका १८ ओटा विवाह भएको सूचक अनुसार पाँच प्रतिशत बालविवाह देखिएको थियो । सबै वडाले ९० प्रतिशत सूचक पूरा गरेकोले घोषणा गरिएको प्रशासकीय अधिकृत शर्माले जानकारी दिनु भयो ।

सुरुङ्गा नगरपालिकाको बालविवाह मुक्त अभियान सञ्चालन निर्देशिका २०७९ अनुसार घरदैलो अभियानमार्फत बस्ती तथा वडाका सबै बालबालिका, किशोरकिशोरी र अभिभावकहरूलाई बालविवाहका विषयमा जनचेतना कार्यक्रम गर्दै सचेत गराइएको छ । बालविवाह हुन नदिन र भएमा कानुनी प्रक्रिया अवलम्बन गर्ने सहितका सूचक पूरा गरेपछि बालविवाह मुक्त घोषणा गरिएको नगर प्रमुख गिता चौधरीले बताउनु भयो ।

कार्यक्रममा नवनिर्वाचित प्रदेश सभा सदस्य अनिरूद्ध प्रसाद सिँह यादब, प्रमुख जिल्ला अधिकारी भुपेन्द्र थापा, पूर्व नगर प्रमुख मुक्तीनाथ चौधरी, जिल्ला वन कार्यालय प्रमुख हेमन्त साह, सबल नेपालका अध्यक्ष जुना गिरीलगायतले शुभकामना मन्तव्य व्यक्त गर्नु भयो । यसअघि २०७६ भदौ २० गते सप्तरीको कञ्चनरुप नगरपालिका मधेस प्रदेशको पहिलो तथा नेपालको तेश्रो बालमैत्री नगरपालिका घोषणा भएको थियो ।


मनोहरकुमार पोखरेल